Angajoqqaaq: - Qutsaterujussuaannarpakka
Atuarfik Ukaliusaq sapaatip akunnerata matuma siuliani marlunngornermi matuneqartoq KNR-imiit sammivarput. Atuarfiullu matunera Erna Rasmussenimmut nuannaajummernartuuvoq.
- Intrakkut allagarsingatta matusoq pissittaanngiluaannangajappungaluunniit qutsatingaarakkit kiisami tusaaneqartutut misigaluta, USK-imi atuartuutilik Erna Rasmussen oqarpoq.
Atuarfik Ukaliusap oqoqarsinnaanera pasittaaneqarmat januaarimi misissorneqartoq oqummillu nassaarfigineqarsimanngitsoq Kommuneqarfik Sermersuumi borgmesteri Avaaraq Olsen (IA) KNR-imut oqarpoq.
Taamaakkaluartorli niaqorlunneq, qasoqqaneq amerlulernerlu, Atuarfik Ukaliusami atuartut ilaasa misigisarsimagaat Erna Rasmussen oqaluttuarpoq.
- Panitta ukiorli malugisarpaa soorlu niaqorlukulaneq soraaraangami qasorujussuarluni sinittarluni, atuarumajunnaaraluarneq taava maannakkut aamma amerlulernerit aallartikkaluarput, ataasinngormat marlunngormaanngikkuni malugivarput kiinnamigut amerlulertoq, taanna oqarpoq.
Misilitsinnissanut kalluaassasoq
Atuarfiup ullormiit ullormut matuneqarnera Erna Rasmussenip nuannaarutigigaluarlugu angajullerni atuartuutimi misilitsittaarnissaanut kalluaanissaa naatsorsuutigaa.
- Uagutsinnut sunniuteqarujussuanngilaq qutsaterujussuaannarpakka, una sunniutigissavaa misilitsittussaatigut uku 8 klasseminngaanniik misilitsittarnerit aallartittarput siunissami ilinnialernissaanut tassunga kalluaanissaa naatsorsuutigerujussuarnikuuarput, Erna Rasmussen oqarpoq.
Atuarfiup ullormiit ullormut matunera kisimi kalluaanngilaq, atuarfiummi nutaap suli atulerneqanngitsup ammanngitsoornerata kingorna ilinniartitsissutissat tamakkerlutik atorneqartannginnerat erloqinartoq meeqqallu siunissaannut aamma kalluaassasoq Erna Rasmussenip ilanngullugu oqaatigaa.
Atuarfiup Ukaliusap matugallarneqarnerata kingorna atuartut angajulliit ulluni pingasuni angerlarsimatiinnarneqarput, atuartullu nukarliit atuareernerup kingorna ornittakkamiisinneqartut, Kommuneqarfik Sermersooq tusagassiutinut marlunngornermi nalunaaruteqarnermini allappoq. Tamannalu atuartuutilimmut eqqarsaammernartoqarpoq.
- Innanganeq angerlarsimaannarneq uku anisarnerannut malunnarsuataarpoq aamma eqqarsarnarluni qanoq annertutigisumik annaasaqassappat misilitsinnissaminut taakkua ullut pingasut atuannginnamik, Erna Rasmussen oqarpoq.
Erna Rasmussenillu atuartuutimi misilitsittaarnissaannut angusarissaarluarnissaat neriuutigiinnarsinnaallugu oqarpoq.
Atuarfiit pillugit suliat erseqqinnerusumik kommunalbestyrelsemut Nuummilu innuttaasunut saqqummiunneqartariaqartut Kommuneqarfik Sermersuumi Siumut gruppianit sakkortuumik piumasarineqartoq, Siumut gruppianit tusagassiutinut nalunaarummi allaqqavoq.
