Atuarfik Inussuk Årets Skolebyggerimi marlunnik nersornaaserneqartoq
Årets Skolebyggerimi nersornaaserneqartup saqqummiunneqarnissaanut Københavnimit toqqaannartumik aallakaatitsisoqarnerani Atuarfik Inussummi atuartut tallimanngornermi ullaakkut malinnaapput.
Atuarfik Inussullu publikumsprisenimik branchens prisimillu nersornaaserneqartoq tassani takuneqarsinnaavoq.
Atuarfik Danmarkimi nunatsinnilu atuarfiit sanaartorneqarsimasut qulit innersuunneqartut akornanniippoq.
Suliffeqarfiup Nohrconip aaqqissugaani taasinermi inuit 1.453-it peqataapput.
Publikumsprisen sanaartorneqarsimasunut taaneqarnerpaamut nersornaasiutigineqarpoq, branchens prisilu suliffeqarfinnit mailikkut taaneqarnerpaamut tunniunneqarluni.
- Atuarfik Inussummi nersornaatit marluk pissarsiarineqarnerat assut nuannaarutigaara, atuarfiup pisortaa, Dorthe Bidstrup tusagassiuutinut nalunaarummi oqarpoq.
- Atuarfik ataatsimoorluni annertuumik suliaqarnermi angusaavoq, tamanna meeqqat ilikkariartornissaannut ineriartornissaannullu atuarfimmi toqqissisimanartumik atugassaqartitsilerpoq, taanna tusagassiuutinut nalunaarummi oqarpoq.
Atuarfik nersornaaserneqartoq isornartorsiorneqaqattaarsimasoq
Atuarfiup aggustimi ammarneqarnerata saniatigut Atuarfik Inussuk pisariaqartinneqarluinnartumik nersornaaserneqarpoq. Atuarfimmi suli ammarneqarani ajornartorsiuteqangaatsiarsimavoq.
Sanaartorneq, ikuallattoqarnissaanut sillimaniarnerup amigaataalluinnarnera pissutigalugu sanaartornermik oqartussat atuarfiup atorneqarsinnaalersinneqarnissaa arlaleriarlutik itigartitsissutigimmatigu ukiunik arlalinnik kinguaattorutigineqarpoq.
Tamatuma kingorna sanaartornermi imaqarniliat atuarfiup toqqammavia nunap qerisarneranit qummut nikeriarsimasoq, igalaat ussiitsut iikkallu ikkussuunnerini kukkunerit saqqummiuppaat.
Kinguaattoornerit aningaasaqarnikkut aamma sunniuteqangaatsiarsimapput.
Atuarfiup sanaartorneqarnerata pitsaassusaata suliallu suliarineqarnerata isornartorsiorneqarnera ilutigalugu sanaartornermi aningaasartuutit 614 millionit koruuninit 633,7 millionit koruunit missaannut ilaneqarput.
Atuarfik 2023-mi naammassineqartussaagaluartoq atuartunut 2026-mi aggustimi aatsaat ammarneqarpoq.
Atuarfimmi atuarfik
Atuarfik Inussuk KHR Architecturemit titartarneqartoq atuartunut 1.300-t missaanniittunut sananeqarpoq.
Atuarfik illuanut mikisukkaartunut arlalinnut aaqqissuussaavoq, taamaalilluni atuartut ukioqatigiiaat immikkoorlutik inissisimallutik.
Atuarferujussuarmik sanaartornissaq siunertaavoq, saniatigulli meeqqanut mikisutut nalorninanngitsutullu misiginassalluni.
Illut arfinillit aqqusiniliamut kaajallagussimasumut aaqqissuussaavoq illullu arfineq aappaat ulluunerani paaqqinnittarfimmut atalluni.
Innersuussisoqarnerani atuarfimmik titartaasup ilinniartitsinermilu avatangiisit issittumi avatangiisinut naleqqussagaanera ilaatigut pingaartinneqarpoq.
Atortut, ullup qaamarnga aamma illup ilusaa Nuup silaannaanut naleqqussarneqarsimavoq silataalu nunatta nunataanit isumassarsiorfiulluni.
Kommuneqarfik Sermersooq suliniummik 2023-mi januaarimili sanaartortitsilerpoq.
Sanaartornermi ingeniørit suliffeqarfiat Verkís, sanaartugassanik suliakkinneqartartoq Ístak aamma nunaminertanik ilusilersuisartut Vega Landskab aamma peqataapput.
Atuarfik Inussuk marlunnik nersornaaserneqartoq Aalborgimi Huset Stigsborg aamma Asnæsimi Campus Odsherred taaguunneqarnerpaat aappaattut pingajuattullu inissipput.