Atlantikup avannaani naalakkersuinikkut siuttut Savalimmiuni ataatsimiilersut

Atlantikup avannaani naalakkersuinikkut suttut sisamat, sillimaniarnerup killiffia pillugu Savalimmiuni illoqarfiit pingaarnersaanni Tórshavnimi ataatsimiissapput.

Danmarkimi ministeriuneq Mette Frederiksen, Savalimmiuni naalakkersuisut siulittaasuat Aksel V. Johannesen, naalakkersuisut siulittaasuat Jens-Frederik Nielsen, Islandillu ministeriunera Kristrún Frostadóttir tassani naapissapput.

Norgep ministeriunera Jonas Gahr Støre attaveqaatit aqqutigalugit aamma ataatsimeeqataassaaq.

Ministeriunerup allattoqarfia tusagassiorfinnut taama nalunaaruteqarpoq.

Naalagaaffiit akornanni pissutsit allanngoraleruttorfianni naalakkersuinikkut siuttut ataatsimeeqatigikulanneranni taama pisoqarpoq.

Naalakkersuisut siulittaasuat Jens-Frederik Nielsen Mette Frederiksenimit Folketingimut sapaatit akunnerisa marluk matuma siornatigut tikilluaqquneqarpoq.

Ministeriuneq Oslomi tallimanngormat aamma ataatsimiigiartoq

Ministeriuneq nunat tamalaat peqataaffigisaannik Norgemi illoqarfiit pingaarnersaanni Oslomi tallimanngormat aamma ataatsimeeqataavoq.

- Naak nunavut nunarsuarmi sumiiffinni assigiinngitsuni naapeqatigiittaraluartut, Issittumi Atlantikullu avannaani sillimaniarnikkut maanna inissisimaneq eqqartussallugu ataatsimeeqatigiinnissarput pissusissamisuuginnarpoq, Mette Frederiksen tusagassiorfinnut nalunaarummi oqarpoq.

- Norge attaveqaatitigut peqataalluni Tórshavnimi ataatsimiittoqarsinnaanera taamaammat nuannaarutigaara, taanna oqarpoq.

Ataasinngornermi ataatsimiinneq sillimaniarnermut tunngassuteqartoq nalunaarutigineqarpoq.

Issittoq sakkulersorfiunngitsutut ukiorpassuanngulersuni isigineqareerluni Atlantikup avannaa piffissami kingullermi aaqqiagiinngissuteqarfiulerpoq.

USA-p Kalaallit Nunaannik persarinninnera, Ruslandip sioorasaarinerulernera, Kinallu Issittumik soqutiginnileriartuinnarnera pissutaallutik nunat killiit naalakkersuinikkut siuttuisa Issittoq aamma soqutigineruleriartorpaat.

/ritzau/