Politiit ullormut nalunaarutaat: Aserorterisoqarneranik nalunaarutit arlallit, tillinniarnerit tillinniariaraluarnerlu

Nakuuserneq, akuerineqarani atorneq, akuerineqarani atoriaraluarneq, angerlarsimaffimmi eqqissiviilliorneq arlalinnillu aserorterisoqarneranik ulloq unnuarlu nalunaarutigineqarput.

Kalaallit Nunaata Politiivini sillimasut pisortaat Aputsiaq Hansen marlunngornermi ullaakkut taama oqaluttuarpoq.

Nuna tamakkerlugu pisut amerlanersai unnuaanerani pipput, taanna oqaluttuarpoq.

- Akuerineqaranili atorneq, akuerineqarani atoriaraluarneq tillinniarnerillu ilai Sisimiuni pipput.

Pisut ilaani ATV-mik aallarussineq iluatsinneqarpoq, sillimasut pisortaat oqarpoq. Pisuni akuerineqarani atorneq tillinniarnermillu nalunaarutit, tamarmik Sisimiuni pigaluartut imminnut attuumassuteqanngitsut taassuma erseqqissaatigaa.

Sisimiuni pisut saniatigut Aasianni aamma tillinniartoqarpoq, sillimasut pisortaata unnuami aserorterisoqarsimanera oqaatigiutigalugu, aserorterisoqarneranik nalunaartoqarnera tallimaanerarpai. Ilaatigut biilit igalaavinik aserorterinerit aamma biili qalipaatit serpalittaatit atorlugit qalipanneqarput, taanna oqaluttuarpoq.

Nunalu tamakkerlugu angerlarsimaffimmi eqqissiviilliornertut nalunaarutigineqartut tassaapput, nakuusernerit marluk pisullu sisamat, Aputsiaq Hansen oqarpoq.