Arnat spirali pillugu suliap politikkikkut atornerlunneqarsinnaanera mianersoqqusissutigigaat
Arnat Kalaallit Nunaanni peqqinnissaqarfik danskinit aqunneqarallarmat akuersitinneqarnatik naartunaveersaasersorneqarsimapput. Kalaallit Nunaat danskit naalagaaffiannit toqqaannartumik aqunneqarallarmat naartunaveersaasersuineq pivoq.
- Misigisimavugut suliaq uagutsinnut tunngasoq Danmarkip, Kalaallit Nunaata USA-llu akornanni avissaartuutsitsiniarnermut atornerlunneqartoq. Nunarpassuit pinngitsaaliillutik naartunaveersaatinik atuisitsillutillu ernisuitsunngortitsisarsimapput, ingammik nunap inoqqaavisa arnartannut. Nunat ikittuinnaat arnanut pisortatigoortumik utoqqatsissuteqarput, soorlu Danmarkip uagutsinnut maanna iliuuserisaatut, Naja Lyberth aqutsisoqatigiinnit oqarpoq.
- USA-mi arnarpassuit pinngitsaaliisaallutik naartunaveersaasersorneqarlutikernisuitsunngortititaasarsimapput, pingaartumik nunap inoqqaavisa arnartaat Amerika Kujallermeersut indianerillu.
Taakkua inuit pisinnaatitaaffii pillugit akiuunnissaminnut periarfissaqarsimanngillat, inuit pisinnaatitaaffii pillugit akiuunnerit, ilaatigut USA-mi, sioorasaarinikkut, parnaarussinikkut, persuttaanikkut toqutsinikkulluunniit unitsinneqartarmata. Trumpip aqutsinerani Amerikami innuttaasut ICE-p paasiniaasartuinit toqutaasut eqqarsaatigaanni,inuit pisinnaatitaaffii aamma illersorneqanngitsut, arnat isumaqarput.
Arnat oqarneri naapertorlugit, Danmark killissamik qaangiinernut qanga pisimasunut tunngatillugu akisussaaffimmik tigusinermigut pitsaasumik inissippoq, inuillu pisinnaatitaaffiinik unioqqutitsinernut qanga pisimasunut iliuuseqarfiginninniara maligassiuinertut isigineqartariaqartoq, arnat isumaqarput.
Apersorneqarumanngitsut
Arnat taakkua danskit tusagassiuutaannit nunalluunniit avataaneersut tusagassiuutaannit apersorneqarusunngitsut Naja Lyberth oqarpoq.
- Inuuvugut misigissusillit. Qaangiiniarnitsinni eqqissisimaartitaanissarput kissaatigaarput ajorunnaarnitsinni, Facebookimi nalunaarummi allassimavoq.
Arnat taakkua ministeriunermit Mette Frederiksenimit septembarimi 2025-mi utoqqatserfigineqarput. Utoqqatserneq akuerineqarumallutik anguniagaqarnerminni ukiorpassuarni ujartorsimasaat.
Arnat taakkua danskit maanna naalakkersuisuisa, naalagaaffeqatigiinnerup oqaluttuarisaanerani inuit pisinnaatitaaffiinik unioqqutitsisarsimanerit iliuuseqarfigiumallugit suliniuteqartarnerat, maluginiarpaat.
- Kalaallit Nunaata Danmarkillu akornanni saammaateqatigiinnissaq anguniarlugu pimoorussamik ineriartortitsisoqarnera misigaarput, Naja Lyberth aqutsisoqatigiit sinnerlugit oqarpoq.
Nunasiaatillit aqutseriaasaat oqaluttuarisaanitsinnut ilungersunartunik kinguneqarsimanera arnanit erseqqissarneqarpoq, aammali Danmark akisussaaffimmik tigusinissamut, akuerinninnissamut nukittunerulernissamullu tunngatillugu ullumikkut iliuuseqartuartoq erseqqissaatigaat. Spiralilersuisimaneq pillugu suliap politikkimut akuliunneqaraluttuinnarnera - pingaartumik nunani tamalaani, arnat ernumanartoqartippaat.