Politiit ullormut nalunaarutaat: Arnaq 59-inik ukiulik aporneqarnermi kingorna toquvoq

Arnaq Nuup qiterpasissuani Brugsenip Kommuneqarfik Sermersuullu akornanni sisamanngornermi unnukkut aporneqarnermi kingorna toqusimasoq, Kalaallit Nunaanni Politiit ilisimatitsipput.

Allattoq Nicole Sander Bertelsen

februaarip 07-at 2025 09:03

Nutserisoq Hanne Petersen

Arnaq 59-inik ukiulik biilinik Nuup qiterpasissuani sisamanngornermi unnukkut aporneqarnermi kingorna toquvoq.

Aamma atuaruk Politiit ullormut nalunaarutaat: Angut ipilluni ajunaarpoq

Biilinik aportittoqarnera unnukkut aqqaninngulertoq nalunaarutigineqartoq, Kalaallit Nunaanni Politiit pigaartuisa pisortaat Jeppe Andsager oqarpoq.

- Ilisimannittut amerlapput, apuinermilli takunnittoqarsimappat politiinut attaveqaqqunarput, Jeppe Andsager oqarpoq.

Mianersuaalliorluni toqutsisimasutut unnerluutigineqarataannaasoq

Biilinik apuisunik ingerlatsisoq angutaavoq 29-nik ukiulik. Angut taanna politiinit attaveqarfigineqartoq, politiit pigaartuisa pisortaat oqarpoq. Suliarli taanna pillugu allamik oqaaseqarsinnaanngikkallarluni, taassuma ilanngullugu ilisimatitsissutigaa.

- Suliaq taanna pillugu allamik oqaaseqangaarsinnaanngilanga. Suliami tassa misissuileruttorpugut, teknikkikkullu misissugassaqaqaaq, ilisimannittutullu killisiorneqartussat aamma amerlapput, Jeppe Andsager oqarpoq.

Suliat taamaattut mianersuaalliorluni toqutsisimasutut unnerluutigineqarnermik kinguneqakkajuttut angullu 29-nik ukiulik ippassaq unnukkut apuisoq tassa mianersuaalliorluni toqutsisimasutut unnerluutigineqarataannaasoq, politiit pigaartuisa pisortaata aamma oqaatigaa.

Suliamili tassani taama ilumut pisoqassanersoq oqaatigisinnaanngikkallaritsik, Jeppe Andsagerip erseqqissaatigaa.

Arnap aporneqarnermi kingorna toqusup ilaqutai kalerrinneqareersut, taanna aamma oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.