Angutit assammik arsartartut januaarimi Frankrigiliassapput

Assammik arsarnermi angutit nunanut allanut unammisartut piukkunnarsaqqaarlutik VM-imut anngunniukkiartussanngorput. Januaarip aallartilaarnerani unammeqatissaat tassaapput Canada, Belgia, Congo iligiillu Frankrigimeersut marluk.

Unammersuarnermik aaqqissuisuuvoq Canadamiut nuna tamakkerlugu sungiusaasuat Christian Latulip. Taanna Parisimi najugaqarpoq taamatullu unammisitsinermik siornatigut aaqqissuisooreerluni.

- Taamatut unammisitsinermut siorna qaaqqusaagaluarpugut. Assammik arsartartut kattuffianni aningaasaqarniarneq taamani ilungersunartumiimmat peqataanngilagut, assammik arsarnermi nuna tamakkerlugu sungiusaasoq Johannes Groth KNR-imut oqarpoq.

- Maanna qaaqqusaaqqippugut. Unammersuarneq aamma allanngortillugu inersimasut saniatigut inuusuttut unammisinneqassapput. Inuusuttunik piukkunnaatilinnik unammisartunik ukiortaami pilersitsinissaq pilersaarutaareermat taamatut immikkuullarissumik angalanissamut qujavugut, Johannes Groth oqarpoq.

Assammik arsartartut kattuffianni TAAK-mi piffissaq kingulleq ataatsimeeqattaartoqarpoq.

Pissutsit nutaat

Frankrigimiit qaaqqusissut isummerfigineqartussaavoq aamma pissartanngorniunnissanut ullut inississorneqartussaallutik. Tassani aamma eqqumaffigineqartussaavoq anngunniulluni VM-imut maajimi unamminissaq USA-mi pisussaq.

Allatut oqaatigalugu nunanut allanut unammisartoqarnermi nutarterisoqarpoq. VM-imut anngunniunnerit ukioq allortarlugu pisartut akornanni nunanut allanut siornatigut unammisoqarneq ajorpoq. Arnat angutillu nunanut allanut unammisartut oktobarimi Islandimiipput ikinnerpaamillu sisamariarlutik angutit pikkorissunut maanna unammissamaalerput.

- Siunissaq ungasinnerusumiittoq pillugu pilersaarusiortalerpugut pisussallu sioqqullugit aningaasatigut matussutissaqarnissaat qulakkeertarlugu. Assammik arsarnermik nunani tamalaani kattuffiup ullorsiutai najoqqutarineqarput piffissani aalajangersimasuni nunanut allanut unammisartut unammiuaarnissaat inissinneqartarluni, Johannes Groth nassuiaavoq.

-  VM-imut maanna anngunniunnissatsinnut piareersimanerusinnaalerpugut. Assersuutigisinnaavara  VM-imut siorna anngunniukkiartornissaq sioqqullugu ataasiaannarluta Nuummi sungiusaqatigiikkatta. Maanna aningaasaqarniarneq pitsaanerulerpoq siumullu pilersaarusiorsinnaanerulerluta. Maanna oqarsinnaanngilagut piareersaqqaarata aallalerluta Johannes Groth oqarpoq.

Angutit inersimasut nunanut allanut unammisartut piukkunnaateqartullu Frankrigiliarlutik januaarip sisamaanni aallassapput.