Nuup Bussiinut ilaaneq aappaagu akisunerulissaaq

Nuup Bussii A/S-ip siulersuisui aalajangerput Nuummi, Nuussuarmi Qinngutsinni busserneq akisunerulissasoq.

Nuup Bussii A/S Kommuneqarfik Sermersoorlu angallannissamut isumaqatigiissutertik allanngortippaat. Akitsuineq februaarip aallaqqaataani atuutsinneqalissaaq, tamannalu klippekortimik bilitsimullu qaammammoortumik pisinermi taamaallaat atuutissasoq, tusagassiuutinut nalunaarummi allaqqavoq.

Klippekortimik pisinermi bilitsimullu qaammammoortumut pisineq 10 koruuninik akisunerulissaaq. Klippekorti 165 koruunimiit 175 koruuninik akeqalissaaq, qaammammoortorlu 595 koruunimiit 605 koruuninik akeqalissalluni.

Bilitsit ataasiaannarlugit atorneqartartut akii allannguuteqassanngillat, 20 koruuniussalluni, Nuup Bussii A/S tusagassiuutinut nalunaarutimini ilisimatitsivoq.