Kalaallinut Christiansborgimi juullerpalaartitsinermut najuuttorpassuusut
Taanna Folketingip Kalaallit Nunaannut ataatsimiititaliaata aaqqissugaraa, KNR-imiillu peqataavugut.
Kalaallit Danmarkimiittut aaqqissuussamut qaaqqusaapput, aaqqissuussamilu piorsarsimassuseq nipilersornerlu qitiutinneqarput.
Allattoq Steve Pedersen Hinrup
decembarip 18-at 2025 07:30
Kalaallinut Christiansborgimi aappassaanik juullerpalaartitsisoqarpoq.
Politikerit, nipilersortartut kalaallillu assigiinngitsunik peqquteqarlutik Danmarkimiittut - ilaatigut napparsimaneq peqqutigalugu Danmarkimiittut aaqqissuussami inersuarmi ataatsimoorput.
Aaqqissuussaq kalaallit juullip nalaani nunaminniinngitsunut ataatsimoorfissatut pilersitaasoq, Folketingip Kalaallit Nunaannut ataatsimiititaliaani siulittaasup, Aaja Chemnitzip oqaatigaa.
Aaja Chemnitz oqalugiaammik aallarniivoq. Aki-Matilda Høegh-Dam folketingimi suleqatigilluarsimallugu qujassuteqarpoq.
Kalaalit Nunaat pillugu ataatsimiititaliap siulittaasuata tulliata, Aki-Matilda Høegh-Damittaaq, oqalugiarnermini Aaja Chemnitzip suleqatigilluarsimaneranut qujassuteqarpoq.
Aaja Chemnitzip oqalugiarnermini pinngitsaalisaammik naartunaveersaasersorneqarnikut akiuussimanerannut nersorinnilluni naggasiivoq. Inersuarmilu ersaartaattoqarpoq.
Ulf Fleischer, The Malikk Nuummi peroriartorpoq, Danmarkimi nipilersornerup silarsuani nipilersuusiortartutut DJ-tullu maannakkut takussaaleriartorpoq, Karina Møller Uummannarmiuaqqallu oqalugiarnerup kingorna tulleriaallutik erinarsorlutillu nipilersorput.
Uummannarmiuaqqani guitarertup, Valdemar Olsenip juullerpalaartitsisoqarnerani nipilersoqataanini nuannernerarpaa:
- Maani appisimaarluni nuanneq. Ukioq kingulleq peqataaqqaaratta, ukioq manna aappassaa peqataalluta, nuanneq, Valdemar Olsen oqarpoq.
Kalaallit aaqqissuussamut peqataasut, nipilersortut unikkallarneranni qanoq misigisaqarnersut KNR-ip paasiniaaffigai.
Marie-Kristine Leibhardt paninilu Kornelia Janussen siullermeerlutik peqataapput, misigisartillu ima nassuiarpaat:
- Nuan. Ilimasunnginnama taama ittumut qaaqqusaariataarnissamut, nalullugu susoqarniarnersoq malinnaarujoorluta. Sunaaffa uisanarsuaartoq. Nuan pikkunaq, Marie-Kristine Leibhardt oqarpoq.
- Nuan attortisimanarpoq aamma assut. Qullilinanngitsuunngilaq aamma, Kornelia Janussen oqarpoq.
Salome Jakobsen uini ilagalugu Københavnimut nakorsiarpoq, nunagisarlu qimallugu juulleriartornerani kalaallit peqatigineri ulluni pikkunarsinnaasuni iluaqutaanerarpaa:
- Iluaqutaavoq assut. Iluaqutaakulooqaaq, imaallaat aamma ilisarisimasat allat takuagut. Alutornaqaaq kalaaleqatit akornaniilluni, taanna oqarpoq.
Aaqqissuussami inissat 150-it missaanniittut tamakkerlugit peqataasoqartarnera, Aaja Chemnitzip qujamasuutigaa.
- Piorsarsimassuseq uatsinnut pingaaruteqarluinnarpoq. Kalaallit Danmarkimiittut kalaalerpalaartumik ataatsimoortissinnaanerannik ikiuutilaarsinnaagama nuannaarutigaara, taanna oqarpoq.
Folketingimut aappaagu qinersisoqassaaq, taamaattumik aaqqissuussap uteqqiasarnissaa Aaja Chemnitzip neriuutigigaluarlugu, folketingimut kikkut isissanersut apeqqutaassasut oqaatigaa:
- Kikkut qinigaassanersut oqaatigineqarsinnaanngilaq, Kalaallit Nunaannut ataatsimiititaliaanili siulittaasuuninni ileqqoq attatiinnarusuppara, Aaja Chemnitz taama oqarpoq.
