Angut kannguttaatsuliornerit pillugit eqqartuussisutigoortinneqassasoq

Kannguttaatsuliornerit, pinngitsaaliilluni, pinngitsaaliinerit, qarasaasiatigut persarinninniarneq, kinguaassiuutitigullu ukiukitsunut kannguttaatsuliornerit arlallit pillugit Nunatta Eqqartuussisuuneqarfiani suliaq ullumi aallartissaaq. Unnerluutigineqartup sivikinnerpaamik ukiunik arfineq-marlunnik pineqaatissinneqarnissaa unnerluussisussaatitaasut piumasaraat.

Allattoq Nicole Sander Bertelsen

juulip 14-at 2025 07:30

Nutserisoq Connie Fontain

Qarasaasiatigut persarinninneq, kannguttaatsuliornerit kinguaassiuutitigullu pinngitsaaliinerit pillugit suliaq Nunatta Eqqartuussisuuneqarfiani ullumi suliarineqarluni aallartinneqassaaq.

Angut unnerluussissut naapertorlugu niviarsiaqqanik 15-it inorlugit ukioqartunik marlunnik kannguttaatsuliorfiginnissimavoq, niviarsiaqqanit ataaseq kinguaassiuutitigut atornerlussimavaa niviarsiararlu alla ukiukitsoq ukiuni marlunni affaanilu qarasaasiatigut persariniarsimallugu.

Angut pissutsini katillugu 19-ini unnerluutigineqarpoq, taakkunannga qulit kannguttaatsuliornermut tunngapput. Sinnerilu meeqqamik 18-it 15-illuunniit ataallugit ukioqartumik pinngitsaaliilluni atornerluisimanermut tunngassuteqarlutik. Meeqqamik 15-it inorlugit ukioqartumik qarasaasiatigut persarinninneq imaluunniit ‘inummut tunngatillugu kanngunartumik’ iliuuseqarneq.

Sivikinnerpaamik ukiuni arfineq-marlunni pineqaatissinneqarsimasunut inissiisarfimmiissasoq

Unnerluussissut naapertorlugu angutip niviarsiaqqanit ataaseq atisaata qaavatigut iviangii ilaatigut attuuasimallugillu piffissap ilaani niuisa akornatigut attuuasimavaa.

Unnerluussissuttaaq naapertorlugu – niviarsiaraq taanna pinngitsaaliniarlugu nakuuserfigalugu imaluunniit sioorasaarlugu pinngitsaalillugu atornerlussimavaa.

Niviarsiaqqanut pingasunut pisut unnerluussissut naapertorlugu 2022-mi apriilimit 2024-mi septembarip naaneranut pisimapput, angut 2024-mi septembarimili tigummigallarneqalersimasoq politiit KNR-imut siusinnerusukkut paasissutissiissutigaat.

Unnerluussisussaatitaasut suliami piumasaqaatiminnut tamakkiisumik taperserneqassagunik angut sivikinnerpaamik ukiunik arfineq-marlunnik pineqaatissinneqassaaq pinerlineqartunullu taarsiissuteqassalluni. Niviarsiaqqamut qarasaasiatigut persariniarneqarsimasumut 5.000 koruunit niviarsiaqqallu sinnerinut immikkut 150.000 koruunit.

Eqqartuussivimmi suliaq Nunatta Eqqartuussisuuneqarfiani ullumimiit sisamanngornermut kiisalu sapaatip akunnerata tulliani ataasinngornermi marlunngornermilu suliarineqassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.