Suliat arfineq-pingasut pissarsiani misissoreerlugit MIO marlunngornermi oqaaseqaateqarpoq. Suliat taakku Peqqinnissaqarfiup meeqqanik nakkutigisaminik sumiginnaasimaneranut tunngasuupput.

Peqqinnissaqarfik meeqqanik nakkutigisaminik alianaqisumik, tassa toqumik kinguneqartumik sumiginnaalluinnarsimasoq, suliani taakkunani pingasuni erserpoq.

Peqqinnissaqarfilli meeqqanik taakkuninnga nakktuginnitsilluni toqumik kinguneqartumik sumiginnaaginnarnani angajoqqaanik annaasaqarsimasunik annertoqqutissaalatsikkajuttuusunik siunnersortissaalatsikkajuttuusunillu isumassuinanilu siunnersuisimanngilaq. Peqqinnissaqarfiullu angajoqqaat annaasaqarsimasut taakku annertoqquteqarnissaannik siunnersorteqarnissaannillu aamma neqeroorfigisimanngimmagit aamma sumiginnarsimagai, Aviâja Egede Lynge isumaqarpoq:

- Angajoqqaammi annaasaqarsimasut kisimiippallaarujussuartut isumaqarpunga. Ilaqutariippassuit kisimiippallaarujussuarput. Tamanna Peqqinnissaqarfiup immikkut ittumik aaqqissuussaaneranik peqquteqarpoq, taanna oqarpoq nangillunilu:

- Suliami Manuminamut angajoqqaavinullu tunngasumi aamma taamaattoq misissuinitsinni erserpoq. Ujartuingaatsiartariaqartarput. Inuunermi artornaqisumeereerlutik siunnersortissarsiortariaqartarput. Qanoq naammagittaalliornissamik misissuisariaqartarput. Tassa tamakkiisumik inuppalaartumik paaqqutarineqarnissaanut piareersimassussanik amigaateqarpugut, Aviâja Egede Lynge oqarpoq.

Peqqinnissaqarfiup aaqqissuussaanera sumiginnaaneranut aallaaviusoq

Nunani allani inunnik napparsimmavinnit isumagisaasunik ikiuunnissamut sillimasartorpassuaqarpoq, soorlu suliniaqatigiiffiit, paaqqinnittarfiit soqutigisaqaqatigiiffiillu. Nunatsinnili taakkununnga assingusunik amigaateqarpugut.

Tamannalu ilungersunaqisoq, Aviâja Egede Lynge isumaqarpoq:  

- Innuttaasut Peqqinnissaqarfiup immikkut aaqqissuusaanerata aqqani oqartussaaqataanerat annikitsuararsuuvoq. Taamaammat angajoqqaat meeqqaminnik nakorsiussinerminni tusaaneqarsimanngitsut amerlapput.

Kukkussuteqartoqarsimaneranik naammagittaalliorniartut ujartuingaatsiaqqaartariaqartarmata qanoq iliorunik pitsaanerussanersoq nalornisarmata ilungersuaqqeriaannartarput:

- Angajoqqaat annaasaqaqqammernerminnik artorsareertut nittartakkamut isiinnaqqullugit nammineertiinnarneqartarnerat inissimaniinngilaq. Paaqqutarineqartariaqarput, aamma qanoq iliornissamik nassuiaanneqarluartariaqarput, Aviâja Egede oqarpoq nangillunilu:

- Inuit nalugunikku sunaqqissaaq allassallugu, imaakkami taava naammagittaalliut suliarineqalerpat tassa nakorsap journalimi allassimasai taakkuupput oqimaannerusussat, taanna oqarpoq.

Kulturikkut assigiinngissutsit naammagittaalliuteqarnermi aporfiusartut

Meeqqat oqaaseqartartuata oqarnera naapertorlugu oqaatsitigut kulturikkullu assigiinngissutsit naammagittaalliuteqarnermi aporfiusarnerat aamma ajornartorsiutaaqaaq, ingammik naammagittaallioriaaseq nunatsinnut naleqqussagaanngitsoq atorneqaraangat. 

Taamaammat ilaqutariit artorsaatillit naammagittaalliuteqarnissaannik siunnersuinnarnagit qanoq naammagittaalliornissaannik aamma siunnersorneqartalertariaqartut, Aviâja Egede Lynge isumaqarpoq: 

- Innuttaasummi tamatumani sanngiitsuarartut inissinneqartartut isumaqarpunga. Naammagittaallioriaatsimik uagut kalaallit eqqarsartaatsitsinnut kulturitsinnullu qaninnerusumik inuppalaarnerusumillu naleqqussaasoqarnissaa pisariaqartipparput, taanna oqarpoq.