Inatsisartut akuersisut: Aalisartut piniartullu silap pissusiata kingunerisaanik ajunaarnersuartut ittumik pisoqarnerani ikiorneqassasut
Naak silap pissusiata allanngoriartornera nunarsuarmi tamarmi ajornartorsiutaaleraluttuinnaraluartoq tamanna aamma nunatsinni malugineqarsinnaalluarpoq.
Silap kianneruleraluttuinnarnera silapilunneralu innuttaasorpassuarnut pinngortitami sulisarlutillu inuussuteqartunut assersuutigalugu aalisartunut, piniartunut savaatilinnullu sunniuteqarsinnaapput.
Taamaammat inuussutissarsiortut taakku silap pissusiata allanngoriartornerata kingunerisaanik aningaasarsiorsinnaanermut periarfissaat siunissami ajunaarnersuarmit eqqugaassagaluarpat imaluunniit silap qanoq inneranit inuussutissarsiorsinnaanermut periarfissaat innarlerneqassagaluarpat aningaasatigut ikiorneqarsinnaanissamut periarfissaqarnissartik ujartorpaat.
Taamalu maanna periarfissaqalissaaq.
Inatsiartunimi amerlanerussuteqartut siunnersuut naalakkersuisunut inatsimmik atuuttumik allanngortitsisussanngortitsisussaq ullumi akueraat, taamaalillutik inuussutissarsiutigalugu aalisartut assersuutigalugu ajunaarnersuaqassagaluarpat pilersitseqqinnissamut tapiissuteqarfigineqarsinnaalissallutik.
Tamannalu pingaaruteqartoq, Mikivsuk Thomassen IA-meersoq isumaqarpoq.
- Silap anorleriataalernerani piniartut aalisartullu ilaatigut pigisaminnik nalituunik annaasaqartarput, naatsorsuutiginngisaminnik. Soorunami ilaa uani pigisanik nalilinnik annertuunik peqaraanni aamma pingaaruteqarpoq sillimasersimasuunissaq. Soorunami uani pingaaruteqartorujussuuvoq tassanngaannartumik pisoqarsimatillugu taava piaartumik ikiorserneqarsinnaaneq, aallartisaqqinnissap tungaanut ikiuutaasinnaasumik, taanna oqarpoq.
Naak inatsimmik, ajunaarnersuaqassagaluarpat imaluunniit nalinginnaasumik ajutoortoqassagaluarpat tapersiisoqarnissaanik qulakkeerutaasumik atuuttoqareeraluartoq silap pissusiata allanngoriartornerata pissutaasutut ilanngunneqarluni allassimanissaa pingaaruteqarpoq – taamaalilluni inatisip allannera piffissamut naleqqunnerusunngortinneqassalluni, taanna isumaqarpoq.
- Naassaanngitsumik aalajangiisoqarsinnaaneq ajorami, soorunami aamma qinigassaqartarpugut, suunuku aaqqitassaanersut, suunuku aporfiusartut. Taamaammat uanga iluarisimaarpara saqqummiunneqarmat.
Silap pissusiata allanngoriartornera kinguneqaataalereersoq
Silalli pissusiata allanngoriartornerata kingunerisassai takuniarlugit siunissaq isiginiarneqartariaqanngilaq. Tamannami tunup avannaani malugineqarsinnaalereerpoq.
Ittoqqortoormiini piniartoq, Scoresby Hammeken oqarpoq.
- Qangatut pisuuppat massakkut sikoreersimassagaluarpugut. Kisianni imaannavissuuvoq, sissap sinaa suli qerineqanngilaq. Aputeqaraluarpugut kisianni suli sikunngilaq, taanna oqarpoq.
Tamannalu piniartut puisinniarnissamut periarfissaannut sunniuteqangaatsiartoq, Scoresby Hammeken nassuiaavoq.
- Siornatigut sikunialeraangat aallarfissaqarluta puiserpassuit pisarisinnaasarpagut. Oktobarimi sikoreerataraluarpugut kisanni maanna aatsaat novembarimi decembarimi ilaannilu aatsaat januarimi siku atorsaalertarpoq.
Taamaammat inatsit nutaaq aamma nuaannaarutigaa.
- Isuma taanna iluartorujussuuvoq annaasaqarnitsinni tapertarilluarsinnaassagatsigu, taanna oqarpoq.
