Aaja: Kalaallit akuunerulersinnissaannut suleriaasissamik pisariaqartitsisoqarpoq
Kalaallillu Danmarkimiittut sammineqarnerunissaat kissaatigaat - aammalu inooqataaniarnikkut ajornartorsiuteqanngitsut pillugit.
Kalaallit qanoq ilillutik Danmarkimi inuiaqatigiinnut akuunerulersinnaanerat pillugu Danmarkimi suleriaasissamik pilersaarummik pisariaqartitsisoqarpoq.
Inuit Ataqatigiinniit Folketingimi ilaasortaq, Aaja Chemnitz Larsen taama isumaqarpoq.
- Isumaqarpunga pingaartorujussuusoq, kalaallinik Danmarkimiittunik itinerusumik isiginninnerulernissaq. Nalunngilarpummi 80 procentii iluamik ingerlasuusut, nalunngilarpullu inooqataaniarnikkut ajornartorsiuteqartunik ilaqartut. Aammattaaq ilisimavarput, kalaallit maannga nuuttartut amerliartuinnartut, Aaja Chemnitz Larsen oqarpoq.
Aamma atuaruk Kalaallit nuuttartut attavigineqapallattarnissaat pisariaqarpoq
Periusissiaq annertusineqassaaq
Danmarkimi illoqarfiit anginerit sisamat, kalaallit inooqataaniarnikkut ajornartorsiortut pillugit ukiuni kingullerni sisamani immikkut ittumik periusissiaqarput.
Periusissiamilu Danmarkimi kommunit, kalaallit illui peqatigiiffiillu akornanni suleqatigiinneq pingaarnermik ajunnginnerulersinniarneqarpoq, kalaallillu ikinnerusut Danmarkimut pereeraangamik sunik ajornartorsiuteqartarnerinik sunillu pisariaqartitsinnerinik, kommunit ilisimasaqarnerulersinniarneqarput.
- Piviusumillu tamanna kalaallinut tamanut Danmarkimi najugaqartunut suliniuteqarnerugaluarpoq, ilaatigullu suliniummit oqaatsinut politikki isigineqassalluni. Qanoq ililluni oqaatsinik ilinniartitsineq kalaallisut danskisullu qulakkeerneqarsinnaava? Oqalutsimik ikiorteqarnerup qanoq ajornannginnerulernissaa qulakkeerneqarsinnaava? Immaqa oqalutsit pioreersut ilinniaqqinnissaannik periarfissaqarlutik? Aammattaarlu misissorneqassaaq eqqaaneqartuartoq tassa palasinik pisariaqartitsineq.
Aamma atuaruk Akuunerulersitsiarnermut aningaasaliissutissat isumaqatigiissutigineqartut
Peqatigiiffik: Kalaallit Nunaata Danmarkillu akornanni inooqatigiinneq pitsanngortissinnaavaa
Pilersaaruteqarnissaq siumumiit folketingimi ilaasartap, Aleqa Hammondip taperserpaa. Taamatullu aamma peqatigiiffik kalaallit meerartaannit generalsekræterip Puk Draibyp taperserlugu.
Puk Draibylu isumaqarpoq, suleriaasissamik pilersaaruteqarnermi oqaluttuarisaanermi nunat taakku marluk akornanni pissutsit eqqarsaatigineqarnerini, kalaallit danskillu inooqatigiinnerat pitsanngortissinnaagaa.
- Kalaallit inooqataaniarnikkut ajornartorsiortut periusissiami sammineqartupilussuupput. Aamma Nunatta Danmarkillu ataatsimooqatigiinnerisa immikkuullarissup oqaluttuassartaata nuna tamakkerlugu periusissiamut ilanngunneqarnissaa. Nuannersumik oqaluttuanngortinniassagutsigu qanoq-iliorluta allanngortissinnaavarput, Draiby aperivoq
