2025-mi tusagassiortut assilisatsialaattut toqqarneqartoq Nuummi Trumpimut akerliussutsimik ersersitsisoq
Assiliisartup Oscar Scott Carlip, Sermitsiami atorfeqartup, assilisaa 2025-mi tusagassiortut assilisatsialaattut toqqarneqarpoq.
Assi USA-p præsidentiata Donald Trumpip Kalaallit Nunaannik tiguaaniarluni oqariartuutaanut akerliussutsimik takutitsinermit assilisaavoq.
Tamanna tusagassiortut assiliisartuisa kattuffiannit ilisimatitsissutigineqarpoq.
Oscar Scott Carlip nersornaat Københavnimi Det Kongelige Bibliotekimi tallimanngornermi ualikkut tiguaa, imalu oqarpoq:
- Kalaallit Nunaat tuniniagaanngilaq.
Toqqaasut, tusagassiortut assiliisartuisa kattuffiannit toqqarneqartut, assiliaq ullumikkut siunissamilu pingaaruteqartutut taavaat.
- Kalaallit Nunaata oqaluttuarisaanerani akerliussutsimik takutitsinerit annersaanni assilisaavoq, kalaallillu assimiittut inuiattut ataatsitut nikorfapput – Trumpilu ataatsimoorlutik akiorpaat, tunngavilersuummi ilaatigut allassimavoq.
- Kalaallit erfalasuat kisimi takuneqarsinnaavoq, inuillu tunuliaqutaasut soorlulusooq qaqqamut ilassuuttut, tulluusimaarlutik ataqqinarlutillu Kalaallit Nunaat sinnerlugu oqariartuuteqarlutik: "Kalaallit Nunaajuvugut. Danmarkiunatalu USA-junngilagut."
2025-mi tusagassiortup assilisatsialaa
Politikenimit Mads Nissen 2025-mi tusagassiortut assiliisutsialaattut toqqarneqarpoq.
Aamma "Alle vi børn i gangsterby"-mik, Sverigemi meeqqat inuusuttullu toqutsinissamut qaartartumeerinissamullu qanoq pinerlunniartunit sulisinneqartarnersut pillugit, allaaserisani pillugit 2025-mi nunanut allanut tunngasunik allaaserinnittutsialattut toqqarneqarpoq.
Tamatuma saniatigut ukioq 2025-mi assilisani inummik assiliisutsialattut, timersornermi assiliisutsialattut ulluinnarnilu inuuneq pillugu assiliisutsialattut toqqaasoqarpoq.
2025-mi tusagassiornerup iluani assilisatsialaat pillugit saqqummersitsineq arfininngornermi ammarneqassaaq, Københavnimilu Den Sorte Diamantimi aggustip qulingiluaata tungaanut alakkarneqarsinnaalluni.
Tusagassiortut assiliisartuisa kattuffiat 1912-mi pilersinneqarpoq, nunarsuarmilu tusagassiortut assiliisartuisa kattuffiini pisoqaanersaavoq.
Tusagassiortut assiliisartuisa kattuffiat ukiumoortumik assilisatsialaat pillugit saqqummersitsinermik 1974-mi aaqqissuussilerpoq, taannalu ukiumi tusagassiortut assilisatsialaattut taaguuteqalerpoq.
/ritzau/
