Qaannamik pissartanngorniunneq: 19-nik ukiulik kinngusaqattaarnermi rekordliliivoq
Qaannamik unammersuarneq maannakkut Sisimiuni ingerlanneqaleruttorpoq.
19-nik ukiulik Nuumminngaanneersoq Sinnii Tobiassen kinngusaqattaarnermi rekordliliivoq taamaasillunilu pissartanngorluni.
Suli qaannamik unammersuaartut aallartinngitsut Sinnii Tobiassen Qaannat Kattuffiannut qinnuteqarpoq inersimasut unammisut akornanni unammerusulluni – 20-34-it akornanni ukiullit unammerusullugit, naak nammineq peqatini unammisinnaangaluarlugit.
Taamaasillunilu kinngusaqattaartut akornanni angusarinnerpaavoq rekordliliillunilu. Pointit 312-it pissarsiarai. Kingullermi 2019-mi rekordliliisoqarpoq, taamanilu Ari Josefsen 306 pointinnappoq.
Qaannamik kinngusaqattaarnermi kinngoriaatsit assigiinngitsut misilittarneqartarput kinngusaqattaarnerillu pointeqartarlutik.
Ilaqutariit qajartornermik soqutigisaqartut
Sinnii Tobiassenip ilaqutai qajartornermik soqutigisaqartuupput. Ataataa Pavia Tobiassen ukiorpassuarni nunatsinni qajartullammaat akornanniinnikuuvoq arnaalu Johanne Tobiassen ukiorpaalunngortuni Qaannat Kattuffianni siulittaasuulluni. Sinniip angajua Ujarneq Tobiassen aamma qajartullammaavoq.
- Soorunalimi ernikka tulluusimaarutigaakka, Pavia Tobiassen oqarpoq. Ernikka qulinik ukioqarlutik qajartortalerput. Sinnii angajumi qajaanut ikeqqaarpoq suli ataasiliinani.
Pavia Tobiassen ukioq manna qaannamik unammersuaartunut peqataanngilaq qanittumi Air Greenlandimi suliffittaarnini peqqutigalugu.
- Ajoraluarpoq, allatulli ajornaqaaq. Taamaattorli ilaquttakka malinnaaffigivakka. Ingerlalluarmata tulluusimaarpunga attorteqqalaarlungalu. Sungiusartuarneq kinguneqarluarpoq, Pavia Tobiassen oqarpoq.
