Israel: Raketit unnuaq igeriussat tamangajammik nakkartinneqarput
Iranip qaartartut ungasianit igeriuttakkat raketillu katillugit 300-t sinnerlugit Israelimut unnuaq igeriussimavai.
Israelimi illersornissaqarfik taama oqarpoq.
Siggartaatit kalerrisaarutit Israel tamakkerlugu unnuaqeqqarsimatsiaannartoq siggartalerput.
Jerusalemimi Jerikomilu silaannakkut saassunneqarnermi illersuutit qaarpallattarnerat tusarsaavoq, Israelimiummi Iranip qaartartui nakkartinniarlugit imminnut illersorput.
Qaartartut raketillu Iranimit Israelimut igeriunneqartut tamangajammmik (99 procentii) nakkartissimallugit Israelip illersornissaqarfiata nalunaarutigaa. Nutaarsiassaqartitsivik Reuters taama allaaserisaqarpoq.
Iranip Israelimik saassussilersaarneranut tusatsiakkat ulluni kingullerni oqallisaareersullu Iran Israelimik unnuaq saassussivoq.
"lliuutsit ilungersunarluinnartut"
Iranip sakkutuuisa (IRGC) saassussisoqarnera arfininngornermi unnukkut uppernarsarpaat.
Iranimiut sakkutuuisa namminneq oqarnerat naapertorlugu Israelip pinerluttuliornera pillarniarlugu taamaaliortoqarpoq, Iranimiut Syriap illoqarfiisa pingaarnersaanni Damaskusimi sinniisoqarfiata Israelimit apriilip aallaqqaataani saassunneqarnera akiniarneqarluni.
Meeraq ataaseq Iranimiut saassussineranni ikilerneqarsimasoq Israeli ullumi ullaap tungaani ilisimatitsissutigaa. Israelip kujasissuani sakkutooqarfik aamma eqqorneqarpoq.
Aqqunartitersimasut aseruatiternerillu pillugit paasissutissanik suli saqqummiussaqartoqanngilaq.
Israelimit qanoq qisuariaateqartoqassanersoq maanna oqallisigineqartoq Israelip nalunaarutigaa.
Israelip illersornissaqarfiata oqaaseqartitaata Daniel Hagarip tv-kkut aallakaatinneqartukkut oqalugiarnermi oqarnera naapertorlugu pisut ilungersunarluinnarput, nunarsuullu immikkoortuani tassani pissutsit najummassimanareeqisut annertusisinneqarnerannik aamma taallugu.
/ritzau/
