Iranimi nutaarsiassaqartitsivik: Iranip sakkutuuisa umiarsuaq Israelimut attuumassusilik arsaarinnissutigaat
Iranip, Iranilluunniit iligisaasa Israel silaannakkut saassunniaraat ulluni kingullerni oqaatigineqartarpoq.
Umiarsuaq Israelimut attuumassuseqarnerarneqartoq Iranip sakkutuuinit ullumi arsaarinnissutigineqarpoq.
Iranimi naalagaaffiup nutaarsiassaqartitsivia Irna taama allaaserisaqarpoq.
Iranip Syriap illoqarfiisa pingaarnersaanni Damaskusimi sinniisoqarfia Israelimiunit pasilliutigineqartutut sapaatit akunnerata siuliani saassunneqareersorlu, Israelip Iranillu akornanni pissutsit ajorsiartuinnarsimapput. Iranimiut arfineq-marluk saassussinermi tassani toqutaapput.
Saassussineq Iranimit akiniarneqarumaartoq Iranip oqaatiginikuuaa.
Iranip piffissami qaninnermi saassussinissaa ilimagalugu USA-p præsidentiata Joe Bidenip tallimanngornermi oqaatigaa.
Iranimiut sakkutuui qulimiguulimmit umarsuarmut ikisut
Umiarsuaq Israelimut attuumassuteqarneragaasoq, Iranimiuniillu arsaarinnissutigineqartoq, Israelimiumit suliffeqarfiutilimmit Eyal Oferimit ilaatigut pigineqartoq Iranimiut nutaarsiassaqartitsiviata Irnap allaaseraa.
Nutaarsiassaqartitsivup taassuma allaaserisaa naapertorlugu Iranimiut sakkutuui immikkut sungiusakkat qulimiguulik atorlugu umiarsuarmut ikipput aqutarilerlugulu.
Israelimit illersornissaqarfik upalungaarsimatinneqartoq, Israelip illersornissaqarfiata oqaaseqartitaa Daniel Hagari oqarpoq.
- Iranip pissutsit ajoreersut annertusiartortinniarlugit aalajangerpagu kingunerisinnaasai Iranip malugiumaarpai, Hagari oqarpoq.
/ritzau/Reuters