Arctic Umiaq Line Upernavimmut aasaanerani angalassisalissaaq

Arctic Umiaq Line Naleraq Seasafarilu Upernaviup, Ukkusissat, Saattut, kiisalu Ikerasaap angalaffiginissaannut pillugu suleqatigiinnissaminnik isumaqatigiissuteqarput.

Arctic Umiaq Line tusagassiorfinnut taama nalunaaruteqarpoq.

Arctic Umiaq Linep kitaata sineriaani nunaqarfiit sivisunerusumik uninngaffigalugit siorna misilittarpai, tamanna najugaqarfinnut, takornarianut inuussutissarsiortunullu iluatsitsilluarfiuvoq, Arctic Umiaq Line tusagassiuutinut nalunaarummi taamanikkut allappoq.

2024-mi aalajangersimasumik Uummannap Nanortallillu akornanni sapaatit akunnerinik marlunnik sivisussuseqartartumik juunip aallaqqaataanit oktobarip 19-iata tungaanut angalasassalernissani Arctic Umiaq Linep taamaammat neriorsuutigaa.

Arctic Umiaq Linep Uummannami akunnerit arfinillit uninnganerani, Naleraq Seasafari periarfissaq atorluarlugu illoqarfik nunaqarfiillu qulaani taaneqartut akornanni Arctic Umiaq Linep kujammut aallaqqinnginnerani taamaasilluni angallassiffigisalissavai.

Upernavik tikinneqartalissasoq

Arctic Umiaq Line marlunngorneq allortarlugu Uummannamut juunimiit oktobari ilanngullugu ukioq manna tikittassaaq. Uummannamiit Upernavik, Ukkusissat, Saattut aammalu Ikerasak ilanngullugu Nanunnguaq (Targa 37) angalasunik ingerlassisalissaaq.

Arctic Umiaq Linep pisortaata Jens-Jakob Sandgreenip Naleraq Seafarimik suleqateqalernissaq tusagassiorfinnut nalunaarummi nuannaarutigaa:

- Una suleqatigiinnissaq sivisuumik eqqarsaatigisimavarput, apeqquterpaalunnik imaqarluni. Anginerugutta naqisimaneqarnerussaagut. Uagut neriuutigivarput nunatta annertussusaa naapertorlugu nunatta nunaqavissullu ineriartortuarnissaat, taanna allappoq.

Naleraq Seasafarimik piginneqataasup Heide Jensenip suleqatigiinnissaq aamma nuannaarutigaa:

- Nuannarutigaarput suleqatigiinnissamut isumaqatigiikkatta. Nunaqavissut suliffiuteqartugut uagutsinnut isumaqartorujussuuvoq, sinersortaat suleqatigalugu maani avannaani tikissinnaasagut amerlissammata. Uiga uangalu, neriuutigivarput uuma suleqatigiinnerup takutissinnaagaa sumiiffinni assiginngitsuni nunaqavissut qanoq suleqatigiillutik ineriartortitsisinnaanerat, taanna oqarpoq.

Inniminniineq Arctic Umiaq Linep inniminniisarfia nutaaq aqqutigalugu inniminniisoqarsinnaavoq.