Arctic Umiaq Line: Sivisunerusumik nunaqarfinniinneq tamanut iluaqutaasoq

Arctic Umiaq Linep kitaata sineriaani nunaqarfiit sivisunerusumik uninngaffigalugit misilittarpai, tamanna najugaqarfinnut, takornarianut inuussutissarsiortunullu iluatsitsilluarfiuvoq, Arctic Umiaq Line tusagassiuutinut nalunaarummi allappoq.

- Isumaqartilluarparput qanoq inuuffiusoq uummarillinerusarnersoq najorniarlugit piffissaqarfigileraangatsigit, Jens-Jakob Sandgreen tusagassiuutinut nalunaarummi ilaatigut oqarpoq.

Qaqortup Ilulissallu akornanni angalaneq sapaatip akunneranik sivisussuseqarsinnaagaluartoq misiliineq pissutigalugu Nanortalimmiit Upernavimmut angalaneq sapaatit akunnerinik marlunnik sivisussuseqarpoq. Angalanerup aaqqissuunneqarnerani nutaami ilaasut umiarsuarmi sininneranni, sivisuumik angalaffiusussat unnuaani angalaffigineqartarput, tamatumalu kingorna nunaqarfinni aalajangersimasuni akunnerit arlallit uninngasoqarluni.

- Umiarsuarmi inuit 200-rut sinnerlugit unnuisinnaapput, angalasut takornariallu sulliinnanngikkaluarlugit, angalanngittut aamma sullinneqarsinnaanerat malunnarsivoq.

Ilaasussat amerlanerusut ersarissaataasoq

Angalariaaseq nutaaq sinersortaatip minutsi 15-ini uninngasarneranit akunnernut arlalinnut allanngortinneqarpoq, tamanna pissutigalugu ilaasussat aalajangersimasut ataasiinnaat pilerisaarnagit amerlanerusut pilerisaarpai.

- Allannguinerup ilaasutigut ersarissimavoq, kaajallaallutik nunaqqatigut takornariartut suliartortullu, apuuffinni unnuinngikkaluarlutik, kisianni ullortik atorsinnaasimallugu, umiarsuaatileqatigiiffiup pisortaa oqarpoq.

Umiarsuaatileqatigiiffik avannaanut Ilulissanut angalalluni aatsaat misiliivoq, misiliinerullu iluatsinnera pissutigalugu umiarsuaatileqatigiiffik 2024-mi aalajangersimasumik Uummannap Nanortallillu akornanni sapaatit akunnerinik marlunnik sivisussuseqartartumik juunip aallaqqaataanit oktobarip 19-iata tungaanut angalasassaaq.