Borgmesteri: Meeqqat illersorneqarnissaat siullertut pingaartipparput
Nuummi atuarfik Ukaliusaq oqoqarnerata sapaatip akunnerata siuliani paasineqarnerata kinguneratigut erngertumik matuneqarpoq.
Atuarfik qanoq sivisutigisumik matoqqassanersoq, Kommuneqarfik Sermersuumi borgmesterip, Avaaraq Olsenip akisinnaanngilaa. Ukaliusamili atuartut atuarnertik ingerlatsiviup aaqqiissutaasinnaasunik misissuinerata nalaani sumiiffinni allani piffissami killiligaanngitsumi ingerlatiinnassagaat, Qanoruumut ataasinngornermi unnukkut oqaatigaa.
- Oqaatigisinnaavaralu aamma ingerlatsivimminngaanniit massakkut misissuisoqarpoq. Nunanit allaninngaanniit tikisitassanik modulbygninginik periarfissanik peqarnerluta, tamannalu kommunalbestyrelsip piaartumik isummersorfigiumaarpaa, taanna KNR-imut oqarpoq.
Ukaliusamilu atuartut 500-t missaanniittut sulisullu 100-t allaanerusunik ulloqarnissartik sungiunniartariaqarallassavaat.
Atuartut 500-t illoqarfiup sinneranut siammarterneqartut
Atuarfimmi atuartut angajulliit sapaatip akunnerata siuliani atuanngittariaqareerlutik nukarliillu atuareernerup kingorna ornittakkaneerlutik sapaatip akunnerani matumani atuartitsineq sumiiffinni assigiinngitsuni nanginneqarpoq.
Ingerlatsiviup atuarfimmi aqutsisut qanimut suleqatigalugit utaqqiisaarutaasumik atuartitsiviusinnaasunik pitsaanerpaanik qulakkeeriniartut, borgmesterip erseqqissaatigaa.
- Siullertut pingaartinneqarpoq meeqqat taavalu aamma sulisut illersorneqarnissaat, peqqinnanngitsumi atuarfimmiitikkusunngilagut. Taava inissisimaffissat assigiinngitsut misissorneqarput. Ulapittorujussuupput ingerlatsivimminngaanniit aamma atuarfiit aqutsisuininngaanniit tassuunartaatigut aamma nersualaarinninnera apuukkusuppara, Avaaraq Olsen oqarpoq.
Atuartut nukarliit Nuummi sunngiffimmi ornikkannut atuarfinnullu agguataarneqarput, angajulliillu Atuarfik Hans Lyngemi miniklubimi atuartitsivinnut inissinneqarlutik.
Inissaalatsinerli pissutigalugu atuartut ilinniartitsisullu agguataartariaqarlutillu atuartitsivinni paarlakaattariaqarput.
Pissutsit angajoqqaarpassuit atuartullu pingaartumik angajullerni atuartut misilitsittussat ernumassutigaat.
- Ilisimaqqissaarpara atuarfimmi ilinniartitsisut aqutsisullu, atuarfimmi ukiup ingerlanerani pensummi angumerineqarnissaa qulakkeerinninniarlutik sukataartorujussuupput. Nalunngilarput uku angajullerni misilitsinnerit assigiinngitsut ingerlanneqartartussaapput, tamakkua pilersaarusiornermi nutaami nalimmassarniarnermi aamma soorunami pingaartinneqarneri neriorsuutigisinnaavara, borgmesteri oqarpoq.
Oqoqarneranik januaarimi misissuisoqartoq
Atuarfik oqummik pasineqarluni januaarimi misissorneqarpoq, tassanili nassaartoqanngilaq. Taamaakkaluartorli atuartut arlallit niaqunngunermik, qasunermik amerlunnermillu ersiuteqarput.
Kommunip paasissutissat ingerlaavartumik pissarsiarisatigut qisuariarfigigai borgmesterip, Avaaraq Olsenip erseqqissaatigaa.
- Tassa paasisat aallaavigalugit iliuuseqaqattaarnikuuvugut, aasaq siullermik ingerlatsivimmik taavalu atuarfiup pisortaanik qanimut oqaloqatigiinnerit ingerlanneqarnikuupput. Taava tassani silaannaq misissorneqarsinavoq, taakkuli oquttoqarneranik pasitsaatsitsisimanngillat.
- Kisianni kingorna atuarfimminngaanniit oqariartuutigineqaqqimmat silaannaq pitsaanngitsoq, sukumiisumik misissuinerit ingerlanneqarsimapput, iikkami putoorisoqarluni taakkualu misissukkat aallaavigalugit ingerlaannaq iliuuseqarpugut, Avaaraq Olsen oqarpoq.
Atuarfik Ukaliusami atuartut ilinniartitsisullu Nuummi sumiiffinni assigiinngitsuni agguataaqqaneranni atuarfik nutaaq Atuarfik Inussut Nuup qeqqani suli inoqanngilaq. Tassani ikuallattoqaratarnissaanut sillimaniarneq kinguaattoortoqarneranut pissutaavoq.
Ukaliusami atuartut siorna marsimili atuarfimmut nunatsinni atuarfinni akisunerpaagallartumut katillugu 1.200-init atuarfigineqarsinnaasumut nuuttussaanikuugaluarput.
