WHO: Europami millionit affaasa covid-19 ukioru toqqutigisinnaagaat

Europami inuit 500.000-it tungaanut amerlatigisut februaarip qaammataata tungaanut coronamik tunillatsissimanertik pissutigalugu toqusinnaapput.

Naalagaaffiit Peqatigiit peqqinnissakkut suleqatigiiffiat WHO taama siulittuuteqarpoq.

Europami coronap tuniluunnera ernumanartorujussuartut WHO-p Europami immikkoortortaqarfiani pisortap Hans Klugep nalunaarutigaa.

Assersuutigalugu Tysklandimi tunillatsittut amerligaluttuinnarput, Tysklandimilu tunillatsittut aatsaat taama amerlatiginerat sisamanngornermi nalunaarutigineqarpoq.

AAMMA ATUARUK Tysklandimi coronavirusimut akiuussuserneqarsimanngitsut akornanni nappaalanersuaqarpoq.

Inuit milliuunit affaat toqusinnaanerannik pisortap oqaaseqarnera, maannakkut ineriartorneq aallaavigalugu tutsiuginartumik eqqorianerusoq taanna oqarpoq.

- Tuniluunnerup aallavianeeqqilerpugut, taanna tusagassiortunut sassarnermini taama oqarpoq.

Inuit 500.000 it toqusinnaanerannik WHO-ip siulittuinera qanoq ilimanaateqartiginera ilimanaateqartiginngineralu ersersinneqanngilaq.

WHO isumaqarpoq, tunllatsitttut amerlinerannut pissutaasoq ikippallaartut akiuussuserneqarsimammata.

Tunillatsittut amerlisimanerannut killilersuinerit annikkillisinneqarsimanerannut pissutaaqataasoq suliniaqatigiiffik WHO isumaqarpoq.

- Covid 19-imik tunillatsittut amerleriartarnerannut qisuariartarnitsinni periuserisartagarpt allanngortittariaqarparput, tunillatsittut amerliartortarnerisa pinngitsoortinneqarnissaanut, Kluge taama oqarpoq.

Europami tunillatsissimasut amerlassusaat sapaatit akunneri sisamat ingerlaneranni 55 procentimik amerlipput. Nutaarsiassaqartitsivik, Reuters taama allaaserisaqarpoq.

- Nunarsuup sinneranut mianersoqqussutaavoq, tassa Europami naak akiuussutissaq periarfissaagaluartoq tuniluuttoqarpoq, WHO-p ajornartoortoqarneranut pisortaa, Mike Ryan oqarpoq.

AAMMA ATUARUK Danmark: Meeqqat atuartut arfinilinnit aqqanilinnut ukiullit akornanni coronamik tuniluuttoqangaatsiartoq

Nunat arlallit killilersuinernik nutaanik ulluni kingullerni atulersitseqqipput. Ilaatigut Hollandimi qanermut assiaqutit tamanit ornigarneqarsinnaasuni amerlasuuni pinngitsooratik atorneqartussanngoqqipput.

Østrigip illoqarfiisa pingaarnersaanni Wienimi akiuussutissamik kapitinneqanngitsut neriniartarfinnut inunnut 25-nit amerlanerusunik iserfigineqarsinnaasunut ilaatigut tikilluaqqusaajunnaartut nalunaarutigineqarpoq.

Europami Ruslandimi coronamut attuumassuteqartumik toqquteqartut 1,4 millionit missaanniipput. Tamanna Europami nappaatinik pinaveersaartitsinermik nakkutilliinermillu sullissiviup (ECDC-p) kisitsisaataasa takutippaat.

Virusip Kina 2019-imi decembarimi paasineqaqqaarneranit nunarsuaq tamakkerlugu 5 millionit toqusimasutut nalunaarutigineqarput.

/ritzau/AFP