Tysklandimi coronavirusimut akiuussuserneqarsimanngitsut akornanni nappaalanersuaqarpoq.

Akiuussuserneqarsimanngitsorpassuit akiuussuserneqassamaannginnerat pakatsissutigalugu, Tysklandip peqqissutsimut ministeria Jens Spahn pingasunngornermi oqarpoq.
Dresdenimi kommunip napparsimmaviani peruluttunut nimmikkoortortaqarfimmi, cornanamik nappaatilik peruluttoq passunneqartoq. Covid-19-ip sisamassaanik tuniluutipiluulernera pissutigalugu, Tysklandimi naalakkersuisut kalerrisaaripput. - Ass.: Robert Michael/Ritzau Scanpix Assi © : Robert Michael/Ritzau Scanpix
Allattoq Ritzau
novembarip 03-at 2021 12:53
Nutserisoq Ulf Fleischer

Coronavirus Tysklandimi sisamassaanik tuniluutipilooqqilersoq, taassuma tusagassiortunut sassarnermi oqaatigaa.

- Pingaartumik akiuussuserneqarsimanngitsut akornanni nappaalaneqaleruttornera maanna misigivarput, nappaalanersuarlu assut sakkortuvoq, Jens Spahn oqarpoq.

Tyskland Europami nunani inuttunerpaalluni 83 millioninik innuttaqarpoq, coronavirusillu sisamassaa tuniluutipiloornerani sapaatit-akunnerit kingulliit ingerlaneranni napparsimasorpassuaqarluni. Nappaammit toqquteqartut ukioq manna maajimili aatsaat taama amerlatigipput.

Inuit 20.398-it ullup unnuallu kingulliup ingerlanerani paasineqarput, 194-illu nappaat toqqutigisimallugu. Robert Koch Institut, kisitsisinik katersuisuusoq, taama ilisimatitsivoq.

Nunap angissusaanut naleqqiullugu Danmarkimi tunillatsittut ikinnerulaarput. Ullumi pingasunngornermi Danmarkimi tunillatsittut 1978iupput. Tassanili ataasiinnaq covid-19imik toqquteqarnikuulluni.

Tysklandimi innuttaasut 83 millionit sinneqarput, tassa Danmarkimi innuttaasuniit 14eriaammik amerlanerullutik.

Tysklandimi 18inik ukioqalereersimasut 80 procentiisa missaat akiuussutissamik marloriarlutik kapitereerput. Danmarkimi kisitsisit taakkua 88 procentiupput. Europami qitiusumik nappaatinik pinaveersaartitsivimmit, ECDC-mit tamanna nalunaarutigineqarpoq.

Spahn oqarpoq,Tysklandimi akiuussuserneqanngitsut akornanni amerlaqisut, misissuinerit kingulliit naapertorlugit, suli akiuussuserneqassamaannginnerat pakatsissutigalugu.

- Akiuussuserneqanngitsummi qaammatini tulliuttuni tunillatsinnissaat ilimanarluinarnerarlugu, Robert Koch Institutimi pisortaq, Lothar Wieler kalerrisaarivoq, oqarpoq.

Spahn oqarpoq, Tysklandip ilaani amerlanerpaanik tunillatsiffiusuni aaqqissuussanut assigiinngitsunut peqataaniaraanni, akiuussuserneqarnikuunermut imaluunniit pitsanngulernermut uppernarsaammik takutitsisarnissaq piumasaqaatigineqartariaqaraluartoq.

Taamatut poltikkeqarneq Tysklandimi 2G-mik taagorneqarpoq.

- Akiuussuserneqanngitsut persaariniarneqanngillat. Peqqinnissaqarfimmili malinnaasinnaajunnarnissaq pinaveersaartinneqarpoq, taanna erseqqissaavoq.

/ritzau/AFP

 

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk