USA-p Danmarkimut aallartitaa Donald Trumpipillu Kalaallit Nunaannut immikkut aallartitaa Kenneth Howery aamma Jeff Landry, Nuummut sapaatip akunnerata siuliani tikeraarput.

Inuit nuimasut assigiinngitsut tikeraarnerminni ulloqeqqasioqatiginissaannut qaaqquaat.

Taakkua ilagaat Vivian Motzfeldt (D) aamma Aaja Chemnitz.

Naalakkersuisut siulittaasuata Jens-Frederik Nielsenip (D)Jeff Landryp  ataasinngornermi kingullermi tikeraarneranut atatillugu oqaatigaa,  pisortatigoortumik oqaloqatigiinnerit saniatigut allanik oqaloqateqartoqannginnissaa pingaaruteqartoq.

Taamaattumik KNR-ip taakkua marluk, sooq Amerikamiut naapikkumallugit akuerineraat aperai.

- Taakkunannga ajunngitsumik pineqarusukkutta qaaqqusissutaannik ilassinninnissarput oqaloqatiginninnissamullu periarfissamik atorluaanissarput uannut pingaaruteqarluinnarpoq. Taamaaliorpungalu, Vivian Motzfeldt oqarpoq nangillunilu:

- Uagut najuutinngikkutta kikkut uagut sinnerluta najuutissava; Jørgen Boassen?

Aaja Chemnitz, Folketingimi maanna ilaasortaasimasoq, assingusumik oqarpoq:

- Uagut kalaallit inussiarnersuugatta aamma inussiarnersuunerput pissutigalugu nunanit allaneersut tikilluaqqusarpavut.

- Uannulli inuttut nammineq akuersaaginnannginnerma aalajangersimasumik paasitinnissaa aamma pingaaruteqarpoq. Taamatullu isiginnittaaseqarnera taakkua aamma qularinngilluinnarpaat.

Isummanik akueriuminarsaanissamut periarfissaq

Aaja Chemnitzip ataatsimiinneq aallartinngitsiartoq taamaaliornissaq isumassarsiatsialaasoq eqqarsaatigaa.

IA sinnerlugu Folketingimut ilaasortaasimasoq maanna siunnersuisarfimmi Inuva-mi siunnersortitut sulivoq.

Tamakkuninnga eqqarsaatiginneqqissaarnini ataatsimiinnerit taamaattut, Amerikamiunit eqqunngitsunik nutaarsiassiissutigineqarsinnaaneranik tunngavilersorpaa.

Jeff Landry Kalaallit Nunaannit qamannga pisumik tikilluaqquneqarsimanerarluni Fox News-imi tallimanngornermi oqaluttuarpoq.

Aaja Chemnitzili Vivian Motzfeldtilu taamatut nutaarsiassiisoqarneranut peqqutaaqataasimasorinngillat.

- Ilaatigut ima oqarfigaara: 'Don't mess with a strong indigenous woman' (Arnaq nunap inoqqaavineersoq nukittooq unammillernagu, aaqq.)

- Uteriitsuuvugut. Pisinnaatitaaffivut pillugit akiuuttuarneq sungiusimavarput. Inuit uagutsinnik aalajangiiniarnerat sungiusimavarput. Taamaattumik pisinnaatitaaffigut pillugit oqaluttuarisaanermi sivisuumik akiuuppugut; nunarput pillugu akiuulluta. Tamanna aamma malugisinnaavaat.

Naleqqami politikerit Amerikamiunik ataatsimeeqateqarnertik pillugu isornartorsiorneqareersullu ilissi taakkuninnga ataatsimeeqateqarnersi eqqumiiginartoq takusinnaaviuk?

- Kalaallit Nunaanni inuussutissarsiornermik ineriartortitsinerup politikkikkullu qanoq ingerlasoqarneranik paasinninnissaq ataqatigiissaarniarlugit ulapputigaakka.

- Oqaatigeriikkattut eqqarsaatigilluaqqaarpara, aamma isumaqarpunga taamaaliortoqartariaqartoq. Kalaallit Nunaata, Danmarkip USA-llu akornanni inuussutissarsiorneq aallaavigalugu siunissami suleqatigiittoqarsinnaanera tamatumalu eqqumaffigineqarnissaa, oqaatigissallugu uannut pingaaruteqarpoq.

KNR-ip USA-p aallartitaa Kenneth Howery apersormagu, USA-p nunap inoqqaavinik qanoq pinninnera apeqqutigaa. Aallartitaq akivoq, nuna ilungersunartunik aqqusaagaqartaraluarluni pitsaanerulernissaq anguniartuaannaraa. Assi © : Markus Valentin / KNR

Ataatsimiinnermut peqataanissannut akuersinnginninni naalakkersuisut isumasioqatigaagit?

- Naamik, politikkikkummi suliniuteqarunnaareerpunga. Eqqarsaatigilluaqqaarparali. Killigititagut soorunalimi ataqqissammassuk.

- Suleqatigiissitat suliaqartippagut isumaqarpungali Amerikamiunik suleqateqarnissamut sinaakkutissarititaasut aalajangiunneqarpata, inuussutissarsiornikkut ineriartortitsinissamut aningaasaliinerit naammassinninnissarput pingaaruteqartoq.

- Taamaattumik Amerikamiunik oqaloqateqarnissaq annilaangassutissaasorinngilara.

Angutit taakkua marluk qanoq isumaqarfigaagit?

- Kenneth Howeryp tamatuma mianernartuunera paasigaa erseqqippoq. Aammattaaq Jeff Landry malittarisassanik nalinginnaasunik maleruaasinnaanngilaq.

Taassumap ataatsimiinnermi taamaattumi suna immikkorluinnaq ittuussutigaa?

- Kalaallit Nunaannik suleqateqarnermi diplomatit periaasii assigiinngitsut marluunerat erseqqippoq; Kenneth Howeryp ileqqutoqqat malinneruai, Landryllu nammineq pilersaarutini maliinnarlugit.

- Præsidentimit tusaaneqarnissani, tassa Donald Trumpimut toqqaannartumik qanoq oqariartuuteqarnissani pingaarnertut eqqarsaatigaa.

Oqaloqatigiittoqarnerussasoq

Vivian Motzfeldt Amerikamiut ataatsimeeqatigineri akerlilersuinerillu imminnut akerleriissutaannginnerarlugit oqaluttuarpoq.

- Innuttaasut akerliunerminnik takutitsinerat ataqqisorujussuuara. Akiunngilara. 
Qanoruumili apersuinermi oqariartuut erseqqissoq tusaavara tassaasoq, nunap inuisa siunissartik namminneq aalajangissagaat.

- Pissutsit qaqugu eqqissinarnerulissanersut naluara. Misigaangali oqaloqatigiinnerit tamarmik pitsaanerulersitsisartut.

Aaja Chemnitzip oqarnera naapertorlugu, Amerikamiut angutitai marluk Kalaallit Nunaata killeqarfiisa suunerinik eqqaaseqqippai.

- Aamma oqarpunga Danmarkimit, nunanit avannarlernit EU-miillu aningaasaliissuteqartoqarnissaa kissaatiginartoq. USA-lu taakkua sisamaattut inississinnaasoq.

- Tamanna oqaluuserisassatut pilersaarutiginngikkaat erseqqippoq.