Pisut: USA-p sinniisoqarfittaavata ammaanersiorneqarnerata nalaani akerliussutsimik takutitsisoqartoq
Inersuarmiippugut, qaqortumik qalipaatilimmi inilu inoqanngitsoq plastikkimik qisummilluunniit assingusumik natilimmi. Amerikamiut erfalasuat teqeqqumiippoq allaffiillu marluk qarasaasiaqareersut inissinneqareersimallutik.
Kunngeqarfimmi Danmarkimi Amerikamiut aallartitaata, Kenneth Howeryip ornippaatigut.
Naak USA sinnerlugu sinniisuullunilu, nunat suleqatigiit ilaaninngaanneersuullunilu nunarsuarmi naalagaaffittut pissaaneqarnerpaameeraluartoq, mittarfimmi ataasinngormat tikimmat naalakkersuisunit najuuttoqanngilaq.
Amerikamiullu sinniisoqarfittaavata ammaanersiorneqarnissaanut atatillugu politikerit peqataanissamut qujaannarput.
Tamanna USA-p aamma Kalaallit Nunaata akornanni pissutsit kiisalu Jeff Landryp, Donald Trumpip Kalaallit Nunaannut immikkut aallartitaata tikeraarnerani pivoq.
- Siulittaasoq nunami ulapaarnerpaat ilagisimassavaat. Suliassaqarnerminut atatillugu peqataasinnaanngitsoq nalunngilara, Kenneth Howery oqarpoq.
- Kalaallit Nunaata USA-llu akornanni atassuteqarnermi ukioq ilungersunarsimavoq.
Qaaqqusat akornanni misigissutsit assigiinngitsut
Sinniisoqarfimmi sinniisup, Susan Wilsonip qaaqqusat nalunaaqutaq marlunngortoq tikilluaqquai.
Naak aaqqissuussinermut peqataaniartoqanngikkaluartoq qaaqqusat nuiumasut arlallit kusanartunik uniforminillu saqqarmioqarlutillu takkupput..
Kommune Kujallermi, borgmesteri, Malene Vahl Rasmussen (D), najuuttunut aamma ilaavoq.
Taassuma USA pillugu akerliulluni allakkani Kenneth Howerymut tunniuppai, kingornalu ammaanersiorneq qimallugu.
Sinniisoqarfimmiittut 60-it missaanniittut imminnut ilisarisimapput, umimmammik hotdogsilianik champagniamillu iggiserlutik ikinngutigiittut oqaloqatigiillutik. Nuannattoqavinngilarli.
Peqataasut suliffimminni atorfitsik pissutigalugu peqataasariaqarpasittutut najuupput.
Tamannali oqaluuserineqanngilaq.
Aallartitaq oqalugiartoq
Hawaii-imiu nipilersortartartoq Daniel Ho taassumalu nipilersoqataasa kalaallit, danskit Amerikamiullu inuiattut erinarsuutaannik atuipput.
Kenneth Howeryp mikrofoni tiguaa. Taassumalu Thomas Jefferson issuarlugu aallartippaa.
Kalaallit Nunaata USA-llu inuunermut, kiffaanngissusermut pilluarnermillu anguniaqarnermi naleqartitat tamarmik pingaartikkaat oqaatigaa.
- Kalaallit Nunaata oqaluttuarisaanera akiuussinnaassuseqarnermik ilusilersugaasoq, nassaarsiullaqqinnermik, pinngortitamut ataqqinninnermik ataatsimoornermillu misigisimanermik unioqqutinneqarsinnaanngitsumik aallaaveqarpoq.
- Siunissaq ilissinnut qanoq ittorluunniit aalajangeraluarussiuk, iligisatut suleqatigisatullu nunami sanileriittuaannarlutalu suleqatigiittuaannassaagut.
Oqalugiarneralu Kalaallit Nunaata USA-llu suleqatigiissitat aamma Joint Comitteemi ukiumoortumik ataatsimiittarnerit aqqutigalugit oqaloqatigiittarnermut sammilerpoq.
- USA-p Issittumi inuiaqatigiinnut ilaasutut suleqatigiinneq ingerlaavartoq, ammasumik oqaloqatigiinneq aamma ataatsimoortumik aqutsineq nunanut Issittumiittunut tamanut siunissap qaamasuunissaanik qulakkeerinissamut pingaaruteqartippai, Amerikamiut aallartitaat ammaanersiornermi oqalugiarami oqarpoq.
Aallartitaq oqalugiarnermini inunnut nipaallutik tusarnaartunut qiviarluni skåleerpoq. Kenneth Howeryp isumassarsianik avitseqatigiittarnissarujussuit aamma ataatsimoorluni periarfissanik amerlanerusunik sillimaniarnermillu pilersitsinissat skåliissutigai.
- Ullormi nalliuttorsiueqatigisinnaagatsigut qujanaq, aamma suleqatigiinnissinnut, ikinngutiginninnissinnut anersaarlu pitsaasoq nunami immikkuullarissumiittoq pillugu qujanaq.
- Ullormik avitseqatigisinnaagassi tulluusimaarutigaara.
Innuttaasut akerliussutsimik takutitsinerat
Aallartitap oqalugiarnera nalunaaqutaq pingasunngortoq naammassivoq. Qaaqqusat ilaat akunneq tulliuttoq oqaloqatigiiffigaat.
Nalunaaqutarli 16.30-nngulersoq isersimasut tamarmik anisimalerput. Taakku Inatsisartut allaffeqarfiata saani inuit 1.000-it tungaannut amerlassuseqartut katersuuttut ilisimavaat.
Inuit maanna aggeriartorput.
Aqqalukkuluk Fontain (IA) akerliussutsimik takutitsinermik aaqqissuussisuuvoq, taannalu sinniisoqarfiup isaariaata saani nipinut sakkortusaammik tigummiaqarluni unguneqarluni nikorfavoq.
Meeqqat, inersimasut utoqqaallu allagartarsuarnik 'USA ASU'-mik allagartaqartunik aamma præsident Trumpip pisoorsuullu Jeffrey Epsteinip assinginik: 'Aap Nato, Naamik Pedo'-mik allagartaqartunik tigummiaqarput,
Akerliussutsimik takutitsisut sinniisoqarfik tunuppaat, inuillu tamarmik minutsini marlunni nipaallisimareersut Aqqalukkuluk Fontain tusaaneqarsinnaaleqqippoq.
Kenneth Howeryp USA-mi tunngaviliisut kisimiilluni issuanngilai - Aqqalukkuluk Fontainip oqaatsit 1776-imeersut aamma atuaaffigai.
Taassuma USA-p nammineq namminiilivinnermut nalunaarutaa issuarpaa. Tassanimi inuit namminneq aalajangiisinnaatitaasut allassimavoq.
- Allagaq inunnit nunami inuisalu naalagaaffissuarmit aqunneqarnissaannik akuersaanngitsunik allagaavoq.
- Tusaasigut. Akiginiagaanngilagut, sakkutooqarnermi atugassiaanngilagut. Kalaallit Nunaajuvugut; inuiaqatigiit, inuit angerlarsimaffillu namminneq siunissaminnik aalajangiisinnaassuseqartut.
- Kalaallit Nunaata nunarsuarmi tamat oqartussaaqataanissaat sorsuutigaa. Kalaallit Nunaat ajorsarpat nunarsuup aaqqissuunneqarnera ajorsassaaq.
Akerliussutsimik takutitseqataasut nipaalluinnariarlutik nipituumik suaartaapput. Tamatumalu kingorna tamarmik tuluttut suaartarlutik
- Go home USA! tassa USA, angerlarit!
