Utoqqaat nappaatillillu covid-19-imut nualluummullu akiuussuserneqarnissaminnut neqeroorfigineqartut

Issinneruleriartorpoq tamannalu napparsimalersut ameranerulernerinik kinguneqarsinnaasarpoq.

Ukiakkut ukiukkullu covid-19-imik nualluummik tunillatsittartut amerlinissaat Nunatsinni Nakorsaaneqarfiup naatsorsuutigaa. Peqqinnissaqarfik nittartakkaminni tusagassiuutinut nalunaarummi taama allapput.

Taamaattumik inuit 65-ileereersimasut inuillu katsorsarneqarsinnaanngitsumik nappaatillit, pingaartumik perulunnartumik napparsimalernissaminnut navianartorsiortut, covid-19-imut akiuussutissamik kapitinnissaat Nunatsinni Nakorsaaneqarfiup innersuussissutigaa.

Inuit nualluummik covid-19-imik tunillatsissimasut amerlanerit annikitsuinnarnik ersiuteqartarput. Inuilli ilai nualluut perulunnartumik napparsimassutigilersinnaasarpaat ajornerpaamillu pisoqartillugu nappaat inuunerannut navianartorsiortitsilersinnaasarluni.

Puakkut nappaateqartut, sukkornermik kræftimillu nappaatillit tassaapput peruluuteqalersinnaasut ilaat, taamaattumillu taakku akiuussutissamik kapineqarnissaannik neqeroorfigineqarput. Akiuussutissamik kapitinnissamut neqeroorfigineqartut peqqinnissaqarfiup nittartagaanni takuneqarsinaapput.

Innuttaasut akiuussutissalertinnissamut aggeqqusissummik peqqinnissaqarfimmiit tunineqarnavianngillat. Najukkami kapitinnissaq neqeroorutigineqaraangat, innuttaasut neqeroorfigineqartut namminneq takkutissapput. Piffissamik inniminniisoqaqqaartariaqanngilaq.

Akiuussutissalerneqarsinnaaneq nalornissutigigaanni, napparsimmavimmut saaffiginninnikkut ilitsersorneqartoqarsinnaavoq.