USA-p sakkutuut 200-t sakkuaakkunnaarnermik malinnittoqarnissaa pillugu Gazamukartikkai

Amerikamiut sakkutuui arfininngornermi unnukkut Israelimut tikipput, taakkulu Israelip sakkutuutullu suliniuteqartup, Hamasip akornanni sakkuaakkunnaarnissamik isumaqatigiissutip atuutsinneqartissavaat.

Atorfilittat aqqatigut taaneqanngitsut suliamik qanimut malinnaaffiginnittut amerikamiut tusagassiorfiannut ABC Newsimut oqarput.

Sakkutuut katillugit 200-t Israelimiitsinneqassapput.

Amerikamiut sakkutuuisa nunat tamalaat akornanni ataqatigiissaariffianniissapput, tassanilu Gazami sakkuaakkunnaarnissamik isumaqatigiissutip malinneqarnissaa nakkutigissavaat.

Tamatuma saniatigut tassannga Gazami ikiuigasuarnermik suliniuteqarnermi ataqatigiissaarinermut ikiuisoqassaaq.

Amerikamiut sakkutuuinik palæstinamiut sumiiffigisaannukartoqassanngilaq.

Tallimanngornermi atuutsilersinneqartoq

Sakkutuut 200-t assartuinermi, pilersaarusiornermi, ingerlasussamik piareersaanermi aqutsinermilu, sillimaniarnermi sakkutuut ingeniøriatut suliaqarnermi immikkut suliaqartartuupput.

Tusagassiorfiup nalunaarutaa naapertorlugu sakkutuut USA-mit aamma Kangiani sumiiffinni allani sakkutooqarfinnit Israelimukartinneqarput.

Israelip Hamsillu Gazami sakkuaakkunnaartoqarnissaa aamma Hamasimit tiguagaaqqasunik iperaanissaq palæstinamiunillu 2000-t missaanniittunik israelimiut parnaarussiviini tigummigallarneqartunik iperaanissaq sisamanngornermi isumaqatigiissutigaat.

Sakkuaakkunnaarnissamik isumaqatigiissut tallimanngornermi atuutilersinneqarpoq.

Hamas Gazami tiguagaaqqasut sinnerinik kingusinnerpaamik ataasinngornermi iperaassaaq.

Isumaqatigiissut sorsunnerup unitsinneqarnissaanut immikkoortoq siulliuvoq, tassanilu tunngaviusumik pilersaarusiat 20-t tunngaviupput, taakkulu USA-p præsidentiata, Donald Trumpip allaffeqarfiatalu suliaraat.

Sakkuaakkunnaarnissap saniatigut Israelimiut sakkutuui Gazamit tunuarteriartussapput.

USA-p tunngaviusumik pilersaarutit 20-t atorlugit Hamas naalakkersuinikkut sakkutooqarnikkullu Gazami pissaaneqarunnaarsinniarpaa.

Gaza sorsunnerup kingorna ataatsimiitialiamit palæstinamiunik nunanillu allanit atorfilittanit inuttaaffigineqartumit siuttuuffigineqarallassasoq, USA-p siunnersuutigaa.

/ritzau/