USA-p  Schweizimi Davosimi World Economic Forum ulluni makkunani ingerlanneqarnerani Kalaallit Nunaata pisiarinissaa eqqartorumaaraa, USA-p præsidentia Donald Trump oqarpoq.

Nutaarsiassaqartitsivik Reuters taama allappoq.

- Pisariaqartipparput. Isumagisariaqarpaat. Danmarkip illersorsinnaanngilaa, inuimmi nuannaartuupput, Reutersip nutaarsiassiinera naapertorlugu Trump tusagassiortunut Floridami taama oqarpoq.

- Siuttui nalunngilakka. Inutsialassuupput, kisianni ornigunnerluunniit ajorput, taassumap ilassutigaa.  

Aammattaaq Trumpip oqaatigeqqippaa, Natop Danmark Ruslandip Kalaallit Nunaannut ulorianartorsiortitsinera pillugu ukiuni 20-ni mianersoqqusarsimagaa, Danmarkili iliuuseqarsimanngitsoq. Tamanna inunnut attaveqaqatigiittarfiutimini Truth Socialimi qanittukkut aamma allaaserivaa.

World Economic Forumimi ukiumoortumik ataatsimeersuaartitsineq januaarip 19-iannit 23-ata tungaanut ingerlanneqassaaq. USA-p aningaasaqarnermut ministeria, Scott Bessent, Schweizimi aningaasaqarneq pillugu ataatsimeersuarnermi peqataavoq.

Trump World Economic Forumimi pingasunngornermi oqalugiassaaq, præsidentitullu 2020-mi siullermeerluni peqataagamili ataatsimeersuarnermut aatsaat peqataaqqilerpoq.

CNN-ip tusagassiinera naapertorlugu, World Economic Forum nalunaarpoq Trump aatsaat taama amerlatigisunik angalaqateqartoq.

Tamanut erseqqissumik oqartoq

USA-p præsidentiata Natop generalsekretæria Mark Rutte “oqaloqatigilluarsimallugu”, inuit attaveqaqatigiittarfianni Truth Socialimi marlunngornermi allappoq.

- Soorlu tamanut erseqqissumik oqaatigisimasara, Kalaallit Nunaat nunannut nunarsuarmilu isumannaallisaanermut pingaaruteqarpoq. Tamanna pinngitsoorsinnaajunnaaqqavoq - kikkut tamarmik tamanna isumaqataaffigaat, Trump allappoq.

Kalaallit Nunaannut tunngatillugu pissutsit pissutigalugit, nioqqutissat Danmarkimeersut Europamilu nunanit arfineq-marlunnit allaneersut, februaarip aallaqqaataanit 10 procentinik akitsuuserniarlugit, USA-p præsidentia arfininngormat oqarpoq.

Kalaallit Nunaannik tiguaanissamik kissaataa nunanit taakkunannga akuersaarneqanngippat, akitsuut juunip aallaqqaataanit 25 procentinik ilaneqassaaq, taanna oqarpoq.

Danmark nunallu allat arfineq-marluk — Frankrig, Tyskland, Tuluit Nunaat, Holland, Norge, Sverige Finlandilu — nalunaaruteqarput Danmarkip Kalaallit Nunaatalu nammineq aalajangiisinnaassuseqarneranik tapersersuillutik.

Aamma EU Danmark Kalaallit Nunaallu tapersersorlugit nalunaarpoq.

Trumpip tamatuma kingorna Kalaallit Nunaannik tiguaaniarnermi sakkutuulersortoqarnaviannginnersoq oqaatigiumanngilaa.

/ritzau/