Politi: Paamiuni pasinartumik toqusoqartoq – inuk tigusarineqartoq

Kalaallit Nunaanni Politiit tallimanngormat nalunaaqutaq 22.45 sianerfigineqarput.

Paamiuni angerlarsimaffimmi inummik toqungasumik siumuisoqartoq.

Politiit anngukkamik arnaq 60-inik ukiulik pineqartoq paasivaat.

Kalaallit Nunaata Politiivi tusagassiuutinut nalunaaruteqarput.

Pissutsilli qanoq innerat pissutaalluni tupaallaatigineqarpoq. Taamaattumik toqusoqarsimaneranut paasisaqarluarumallutik misissuineq aallartippaat. 

Danmarkimi Pinerluttoqartillugu Misissueqqissaartarfimmit aamma Toqusut Timaannik Misissuisarfimmit aggersaasut Politiit paasissutissiissutigaat.

Pasisaq tigusarineqartoq

Suliamut tunngatillugu angut tigusarineqartoq, pisortap tullersortaa Malik Sandgreen maanna oqaluttuarsinnaanngorpoq.

- Angut arnap toqungasup timaata piffissami tassani nassaarfimmiinnera pissutigalugu,  pisut assigiinngitsut misissorneqarnerini, suliamut tunngatillugu tigusarineqarpoq.

Politiit angutip isikkua paasititsissutiginngilaat.

Sermersuup Eqqartuussiviani inatsit tunngaviusoq naapertorlugu sapaatiummat killisiorneqarpoq. 

Tassani ulluni 26-ni tigummigallagassanngortinneqarpoq.

Misissuineq suli ingerlanneqarmat, matoqqasumillu eqqartuussisoqarmat Politiit paasissutisseeqqissinnaanngikkallarput.

Arnap toqungasup ilaqutai nalunaarfigineqareersut tusagassiuutinut nalunaarummi allaqqavoq.