Sulorarnermi Arctic Winter Gamesimi peqataasussat toqqarneqarput
Sulorarnermi nuna tamakkerlugu sungiusaasoq Rune Svenningsen aappaagu marsimi Arctic Winter Gamesimi unammisussanik arfineq pingasunik qanittukkut toqqaavoq.
Illoqarfiit Nanortalik, Qaqortoq, Paamiut aamma Nuuk issittormiut unammiuaarnissaanni peqataatitaqassapput issittormiut timersortartut 2.000-it sinneqartut timersuutini assigiinngitsuni unammiuaalerpata.
Rune Svenningsenip unammisartut piffissami sivitsortumi malinnaaffigai. Pisuni assigiinngitsuni malinnaaqqissaarnerat pereermata toqqaavoq.
- Aasap siuliani inuusuttuaqqanik Savalimmiuniisitsivugut ukioq mannalu Islandimiisitsilluta. Ukiaanerani aamma sungiusaqatigiittoqarpoq kiisalu pissartanngorniunnerni unammisartut malittareqqissaarneqarlutik, Rune Svenningsen toqqaaniarnermi suleriuseq pillugu oqarpoq.
- Sungiusaasut unammisartullu oqaloqatigisarpakka qanoq ingerlanerat anguniagaallu pillugit, Rune Svenningsen oqarpoq.
Timersuutit arlariit ukiut kingulliit Arctic Winter Gamesimut peqataatitsinatik allanut unammiartortarput. Futsalertartut sisoraaserlutillu oqilaniuttartut Europamut unammiartortitsisarput Arctic Winter Gamesimit peqataaneq akisugalugu.
Piumaffigineqarnerupput
Sulorartartut kattuffiat 2024-mi ataatsimeersuarnermini aalajangerpoq Arctic Winter Gamesimi peqataasarneq ingerlaannassasoq. Inersimasuni nunanut allanut kingusinnerusukkut unammisartuulersinnaasut makussarfissaattut Arctic Winter Games atorneqarpoq.
- Arctic Winter Gamesimut unammiartornermi nunagisaq sinnerlugu unammiartortoqartarpoq. Kalaallit erfalasuat sakissamiittarmat imminuinnaq pinnani unammineruvoq. Nunagisaq sinnerlugu unammillunilu angalaneruvoq, Rune Svenningsen oqarpoq.
- Tamanna anginerumik piumaffigineqarnermik nassataqarmat inuusuttuaraanermi misiginissaa pitsaasuuvoq inersimasunngornermi suli misigisimanagu unammiartortoqannginniassammat, Rune Svenningsen oqarpoq.
Sulorartartut Nunatsinneersut Arctic Winter Gamesimi peqataanermi ujamminik pissarsilluartarput.
- Ujamminik angerlaassilluartarpugut. Kisianni Arctic Winter Gamesimut tikittarpugut unammisassavut nalullugit. Nunat peqataasut qanoq pikkoritsigisunik peqataatitsinersut nalusarparput. Taamaattoq Arctic Winter Gamesimi peqataasartut ujamminik angerlaassilluartarmata taama pisoqaqqinnissaa neriuutigaarput, Rune Svenningsen oqarpoq.
- Nalilersueriaaserali malillugu suli inuusuttuaraapput tassanilu pingaarneruvoq inerisarneqarlutik taamatut peqataanermi ilikkagaqarnissaat. Ujamminassappata soorunami nuannaarutigikuttuussavarput, Rune Svenningsen oqarpoq.
Toqqarneqartut tassaapput:
Inuusuttuaqqat angajulliit:
Arnajaraq Lange Frederiksen (NAG)
Mia Rasmussen (NAG)
Emanuel Thomsen (NBK)
Rico Dahl Kielsen (TEN)
Inuusuttuaqqat nukarliit:
Qaaqa Josefsen (TEN)
Carla Kleist (B67)
Dicky-John Thorsteinsen (NBK)
Bruno Nathansen (TEN)
Sungiusaasut:
Cecilia Josefsen Josenius (TEN)
Miko Schiøtt Kongstad (BKN)
