Kalaallit Nunaanni politiit peqatigiiffianni siulittaasoq: - Soorunami nuannaarutigisorujussuuarput

Kalaallit pineqaatissinneqarsimasunut inissiisarfimmi sulisut, politiit eqqartuussivinni sulisut allallu naalagaaffiup suliffiutaani atorfillit, Danmarkimi suleqataallu atugassarititaat Danmarkimisuulli naligiissitaalerput.

Aningaasaqarnermut ministereqarfik tusagassiuutinut nalunaarpoq.

Tamannalu Bjørn Bjerregaardip peqatigiiffimmut isumalerujussuusoq KNR-imut oqarpoq.

- Soorunalimi nuannaarutigisorujussuuaarput, kiisami taamatut aalajangertoqarmat. Ukiorpassuit taanna anguniarsarinikuugatsigu naalagaaffiup ataani sulisut assigiimmik aningaasarsiaqartitaanissaat pensionillu. Angusaq uatsinnut annertoorujussuuvoq isumalerujussuullunilu.

Kalaallit Nunaanni politiit peqatigiiffiata siulittaasua Bjørn Bjerregaard oqarpoq.

Danskit aningaasaqarnermut ministeriata, danskit inatsiseqarnermut ministeriata kiisalu Aningaasaqarnermut Akileraartarnermullu Naalakkersuisup Múte B. Egedep isumaqatigiissutigaat.

Naligiissitaannginneq pissutigalugu, politiit nunaqavissut politiitut atorfeqarunnaarlutik allani suliffeqalertarnerata ilorraap tungaanut saatsinneqarsinnaanissaa siulittaasup neriuutigaa. 

- Neriuutiginersaavara soorunami kalaallit siunissami piumanerussasut politiinngorniarnissaminnut. Immaqalu soraarnikut, taamaatinnikut imaasinnaavoq ilaat utersinnaasut, amigaatigeqigatsigit politiit kalaallit, ikiligaluttuinnaratta, taanna oqarpoq.

Atugassarititat allanngussasut

Danskit nunatsinnilu politiit assigiimmik akissarsiaqalernerisa saniatigut sulinermi atugassarititaasut aamma assigiilissapput.

Assersuutigalugu politiit sapaatip akunneranut nalunaaquttap akunneri suliffigisartagaat 40-nit 37-nngussapput.

- Taakkua 40 tiimit malissagaanni sulinerusarpugut Kalaallit Nunaanni. Taamaattumik freernerulernissaq isumalerujussuuvoq, taanna suleruluttarnermut qasujaallisaatitut aamma atorneqarsinnaalissagami, Bjørn Bjerregaard oqarpoq.

Soraarnerussutisiat allanngornissaat neriuutigineqartoq

Naak aningaasarsiatigut atugassatigullu assigiittoqaleraluartoq suli soraarnerussutisiatigut suli nikingasoqarpoq.

- Qallunaat pensionii taavalu Kalaallit Nunaanni naalagaaffiup ataani nikingasorujussuugamik, taanna oqarpoq nangillunilu:

- Ajoraluartumik uagut tassani ilanngunniarsarigaluaratsigit taakua pensionereernikut. Kisiat paasisakka malillugit taakua kingusinnerusukkut aamma qaqilertorneqarniarput, Bjørn Bjerregaard oqarpoq.

Soraarnerussutisiassat suli ilanngunneqanngitsut, alloriarnissamilu tullinnguutissasut ilisimatitsissutigineqarpoq.