Siumut sillimaniarnermut isumaqatigiissummi USA-p pisussaaffii politikkikkut nakkutigineqartariaqarsoraat
Siumup siulittaasuata Aleqa Hammondip USA isumaqatigiissummi soorlu: avatangiisitsinnut, pinngortitamut inooriaatsitsinnullu tunngatillugu aalajangersakkanik malinninnera pillugu, immikkut nakkutilliisunit nakkutigineqartariaqarsoraa.
- Pisussaaffiit isumaqatigiissutigineqarsimasut malinneqarnersut paasiniarlugit nakkutilliisoqartuaannartariaqarpoq, KNR-imut oqarpoq.
USA-p avatangiisinut tunngatillugu pisussaaffimminik siornatigut qimarratiginnissimanera eqqaavaa.
- Avatangiisini ulloq manna tikillugu salitassarpassuarnik Amerikamiut peqarmata. Taannalu pisariaqarsimavoq erseqqissassallugu pisussaaffilerlugu avatangiisitsinnik mianerinnittunik inuiaqatigiinni suleqatiginnittoqassasoq, Aleqa Hammond oqarpoq.
Illuatungeriit tamarmik pisussaaffimminnik malinninnerannut tunngatillugu ataavartumik nakkutilliineq ataatsimiititaliamit, Joint Committeemit, aaqqissuunneqassannginnerarpaa politikkikkulli suleqatigiissitamit, pingaartumik isumaqatigiissutip immikkoortuani siullermi, aaqqissuunneqartariaqarnerarlugu.
Hammondip oqarneratut, inuiaqatigiit avaqqutaaginnarlugit nunarput pillugu aalajangiisoqartarnikuummat taamannak nakkutilliisoqartariaqarpoq.
Isumaqatigiissummi nunatsinni pinngortitamut, avatangiisinut, kulturimut inooriaatsimullu tunngatillugu oqaasertaliinertaqartoq erseqqissaatigaa:
- Ilassut Kalaallit Nunaanni innuttaasut toqqissisimanissaannut pingaaruteqartorujussuuvoq, Danmarkip akuersineratigut oqaluttuarisaanitsinni qanoq iliuuseqarfigineqartarsimanigut qiviaraanni.
Nunarput nukittunerusumik inissisimaffeqartariaqarsimagaluartoq
Naalli Siumup nunat pingasut isumaqatigiissuteqarnissaq isumaqatigiissuteqarnerat naammagisimaaraluarlugu nunarput illersornissaq pillugu suleqatigiinnermi naligiinnerusumik inissisimasimasariaqaraluartoq isumaqarpoq.
Isumaqatigiissut illersornissamut isumaqatigiissummut pioreersumut 1951-imeersumut ilassutaavoq.
Aleqa Hammondip oqarnera naapertorlugu nunarput isumaqatigiissutaasunut ilassutaasunut atsioqataasuuginnarani isumaqatigiissummi pingaarnermi naligiimmik suleqataasariaqaraluarpoq.
- Illersornissamut isumaqatigiissutip ilassutaani peqataaginnarata ilusilersorneqarnerani oqaasissaqarneroqataasimagaluarutta nunatsinnut naleqqunnerussagaluarpoq, taanna oqarpoq.
Taassumali nunat pingasut Issittumi eqqissinermik sillimaniarnermillu attassiniarnermik isumaqatigiissuteqarnerat pingaarnerpaasoq erseqqissaatigaa.
Siumulli tamanna ilorraap tungaanut alloriarnerusoraa, partiillu tamarmik isumaqatigiissummik malinninnissamut pissussaaffeqarlutik.
- Amerikamiut, danskit kalaallillu naligiimmik uani ilassutitut isumaqatigiissummik atsioqatigiissimanerata peqqutigisaanik, Amerikamiut pisussaaffimminnik malinninnersut Kalaallit Nunaanninngaanniit qulakkiissallugit pisussaaffigaarput, Aleqa Hammond oqarpoq.
Isumaqatiginninniarnerit Siumup naalakkersuisoqataajunnaarneranik kinguneqartut
Inatsisartut illersornissamut isumaqatigiissut sapaatip akunnerata tulliani oqaluuserinnilerpata Siumup isumaqatigiissuteqarnissamut suliaqarneq aamma samminiarpaa.
Aleqa Hammondip partiip aqutsisui Inatsisartuniluunniit tunuliaqutai naak partiip naalakkersuisoqatigiinnissamut isumaqatigiissut naapertorlugu nunanut allanut sillimaniarnermullu politikki akisussaaffigigaluaraa isumaqatiginninniarnermut peqataatinneqanngitsut oqaatigaa.
Taassuma oqarnera naapertorlugu tamanna Siumup naalakkersuisooqataajunnaarneranut pissutaasut ilagaat.
- Isumaqatiginninniarnerit qanoq ingerlanerat paasisaqarfigisinnaanngivissimavarput tamannalu naammagisimaarsimanatigu, taanna oqarpoq.
Taassuma partii siulersuisuminik siulittaasuminilluunniit peqataatitsinissamut periarfissaqartinneqanngitsorluunniit oqaatigaa.
- Partiitut isumaqatigiissut ilisimanniffiunngitsoq peqataaffigisinnaasimanngilarput, Aleqa Hammond oqarpoq.
Issittumi aaqqiagiinngissuteqartoqarnerulernissaa ernumassutigigaa
Siumup siulittaasuata illersornissamut isumaqatigiissut nunat tamalaat akornanni ineriartornerup annertunerusup, tassa pissaanilissuit sakkutooqarnikkut Issittumi ukiuni aggersuni unammilleqatigiinnerulernissaannut ilaasutut isigaa.
Allatut oqaatigalugu: USA-mut isumaqatigiissut nutaaq Issittumi piffissap nutaap aallartinneriinnarpaa. Nunatsinni eqqaanilu sakkussiorneq sakkutooqarnikkullu suliaqarneq atuuttuartussanngorluni piulersoq taanna isumaqarpoq.
Partiip siulittaasuata misilittagartuup Naalagaaffiit Peqatigiit ataanni immap naqqata nunavimmut atasortaata killinganut piumasaqaatinik suliarinninnissaq aamma Ruslandip assinganik piumasaqaateqarnera siunissami aaqqiagiinngissutaasinnaasutut ilaatigut erseqqissaatigaa.
Aleqa Hammondip oqarnera naapertorlugu ineriartorneq tamarmi USA-p NATO-milu nunat akornanni aaqqiagiinnginnerulernermik kinguneqarsinnaavoq.
Taamaammat nunatta soqutigisani - illersornissamut isumaqatigiissummut atatilluguinnaanngitsoq, kisianni aamma Issittoq Qalasersuarlu pillugit nunarsuarmi politikkikkut apeqqutinut siammasinnerusunut tunngatillugu nukittuumik ersarissumillu ersersissagai isumaqarpoq.
- Nunatta inissisimaffitsinnik aamma illersornissamut isumaqatigiissummut tunngasuinnarmiinngitsoq kisianni Qalasersuarmut tunngatillugu unammilleqatigiinnermut tunngasuni nukittuumik inisissimanissaa takutitsinissaalu pingaaruteqarpoq, taanna oqarpoq.
