Siulittaasoq tullersortaalu Atassutip ataatsimeersuarnerani qinigaaqqittut

Atassut nuna tamakkerlugu Nuummi arfininngormat ataatsimeersuarmat allannguuteqarujussuartoqanngilaq.

Aqqalu C. Jerimiassen Atassummi siulittaasutut toqqarneqaqqippoq, Bentiaraq Ottosenilu siulittaasup tulliatut ingerlaqqilluni.

Tamatuma saniatigut nunatsinni sumiiffinni assigiinngitsunit siulersuisunut ilaasortanik taasisoqarpoq. Siorapalummit, Upernavimmit, Tunumi Tiilerilaamit siulersuisuunernut ilaatigut ilaasortaqarpoq.

Atassutip naalakkersuisoqatigiinni siunissaa pillugu apeqquteqarfigineqarami ima akissuteqarpoq:

- Naalakkersuisoqataanitsinnut tunngatillugu Atassutip aallartitaat taasisinnaallutik ingerlaqqinnissaat taperserneqarpoq, Atassut taamaalilluni naalakkersuisoqatigiinnissamut isumaqatigiissummi malillugu angusaqarluarsinnaassalluni, siulittaasoq, Aqqalu C. Jerimiassen KNR-imut oqarpoq.

Inuuniarnermi atugassarititaasut pitsaanerusut

Nuna tamakkerlugu ataatsimeersuarnermi Qaanaap eqqaani piniakkat aamma nunatsinni meeqqat inunngortartut ikippallaarneri ilaatigut oqaluuserineqarput.

Tamatuma saniatigut innuttaasut ullumikkut inissisimaneranni pissutsinut aaqqiissutissarsiornissaq aamma sammineqartoq, Aqqalu C. Jerimiassen nassuiaavoq.

- Pingaarnersiuinerit taakku ataatsimut isigissagaanni inuiaqatigiinni ullumikkut atugaasut aaqqiivigineqarnissaanik tunaartaqarnerput pingaarnerpaajuvoq. Ullumikkut atukkat eqqarsaatigalugit aningaasaqarnikkut aningaasat naleerukkiartornerat eqqarsaatigalugu malinnaatitsisumik iluseqalernissaanut tunngatillugu suliaqartariaqarnerput, Inatsisartuni ilaasortat suliassarisariaqaraat sakkortuumik kaammattuutigineqarpoq taanna ataatsimeersuartuninngaanniit. 

Ataatsimiinnermi partiip ukiunut aggersunut periusissaa aamma oqaluuserineqartoq, Aqqalu C. Jerimiassen oqarpoq:

- Periusissiaq Atassutip ukiuni tulliuttuni pingasuni sulissutigisassaanik imaqarpoq, najukkanilu peqatigiiffiit malinnaatinneqassapput saniatigullu anngunnikuusaat sulissutigineqassapput, taanna oqarpoq, itisiliillunilu:

- Peqatigiiffiit suliaqarnermut peqataajuartutut misigisimanissaat pingaarnerpaavoq.