Tasiilaq: Erngup nukinganik nukissiorfik pissutsinut malinnaasinnaajunnaarpoq

Biili assakaasumigut sisamanik nutsuisulik qaqortoq ujaraaqqat aappalaartut ingerlaarfigai.

Ingerlatsiviup pisortaata, Niels Vangip qimuttut saneqqullugit Nukissiorfiit Tasiilap avataani atortorissaarutaata tungaanut ingerlaarpoq.

Nukissiorfik tasersuarnit marlunnit erngup nukinganik nukissiorfimmit illoqarfimmut mingutsitsinngitsumik ukiorpassuarni sarfalersuivoq.

Niels Vangillu suut tamarmik ajunngitsumik ingerlanissaat ukiuni qulikkaani misilittagaqarfigaa.

Assi © : Markus Valentin / KNR

Siornali ukiukkut nutaamik pisoqarpoq. Erngup nukinganik nukissiorfik naammattumik sarfalersuisinnaajunnaarpoq.

Nukissiorfiup ajoquteqarnera pissutaanngilaq, kisianni illoqarfik tunniunneqarsinnaasumit annerusumik atuivoq.

Taamaammat Nukissiorfiit pisariaqartitsineq malinnaaffiginiarlugu erngup nukissiorfiup saniatigut dieselimik motorilimmik ukiuunerani atuivoq.

- Maannali qaangerneqarmat motorimik ingerlaneruvugut, Niels Vang oqarpoq.

Assi © : Markus Valentin / KNR

Tasiilami ineriartortoqaannassappat politikerit piffissami aggersumi aalajangiisariaqartut, ingerlatsinermi pisortaq, Niels Vang oqarpoq:

Ajornartoornermi generatorimut dieselitortumut saniatigut atorneqartussamut aningaasaliisoqanngikkuni erngup nukinganik nukissiorfik allilerneqarluni siunissamut qulakkeerneqassaaq.

Pisariaqartitsisoqarnerusoq imeq minnerusoq

Illoqarfimmi ukiuni kingullerni nutaamik aalisakkeriveqalerpoq. Saniatigut inissianik nutaanik sanaartortoqarpoq. Angerlarsimaffeqanngitsullu najugassaannik containerinik pilersitsisoqarluni.

Taakku tamarmik erngup nukinganik nukissiorfiup pilersortariaqarpai, taamaammat dieselimik motoritortoq pisariaqartinneqarpoq.

Naak taamani naalakkersuisuusup, Naaja Nathanielsenip (IA) paragraf 37-mut siorna septembarimi akissummini erngup nukinganik nukissiorfiup sanaartukkat nutaat pilersuiffigisinnaagai nalileraluaraa taama pisoqarpoq.

- Ukiut tulliuttut marluk tallimallu ingerlaneranni erngup nukinganik nukissiorfimik nutaamik ajornartoornermiluunniit nukissiorfimmik pisaartariaqarpugut, taamaalilluta innaallagissamik illoqarfimmi pisariaqartinneqartumik pilersuisinnaassaagut, Niels Vang oqarpoq.

Nukissiorfiit innaallagissiorfiinit marlunnit ataaseq nunap avataani tasersuarmiippoq, imeq tassanga ingerlaarluni illoqarfimmut sarfalersuisarpoq. Assi © : Markus Valentin / KNR

Tasiilap timaaniittut tatsit marluk ernga nunakkut motoorinut nukissiortunut kuuppoq.

Erngali piffissamilkingullermi annikinneruvoq. Niels Vangip silap pissusiata allanngoriartornerata kingunerisaanik siallerpallaarunnaalernera pasitsaateqqavaa. 

- Imermik amigaateqarpugut. Taseq angivallaanngilaq, taamaattumik imeq atoqqittarsinnaasuugutsigu pitsaassagaluarpoq, Niels Vang oqarpoq.

Tamanna Niels Vangip nammineq aalajangigassarinngilaa, Inatsisartunili politikerit Nukissiorfinnilu qullersaqarfimmi sulisut aalajangiisussaapput.

Iddimanngiiu Jensen Biancop (IA) Tasiilami erngup nukinganik nukissiorfiup allilerneqarnissaa naalakkersuisunit sooq unitsinneqarnersoq siorna apeqqutigaa. Taamaaliornissap akisuallaarnera erngullu nukinganik nukissiorfiup sanaartornermut malinnaasinnaanera akissutigineqarpoq. Malinnaasinnaannginnerali kingorna paasinarsivoq.  Assi © : Markus Valentin / KNR

Utaqqineq mianernartumi inissisimatitsilersoq

Tasiilami mittarfiliortoqarnissaa kissaatigineqarpoq. KNR-ip Tasiilarmiut oqaloqatigigamigit tamanna erseqqippoq.

Containerit najugaqarfissatut sanaanit 40-nit arfineq-pingasut taamaallaat maanna atorneqarput.   Aammattaaq illoqarfik eqqakkanut suli kuuffissaalersugassaavoq ukiunilu tulliuttuni inissialiortoqarnissaa naatsorsuutigineqarpoq.

Tamakku tamarmik innaallagissamik pilersorneqarsinnaassappata politikerit arlaatigut aaqqiissutissarsisariaqartut ingerlatsinermut pisortaq oqarpoq - dieselitortumik atuinerussagaanni erngulluunniit nukinganik atuinerussagaanni.

- Pisariaqartitsileraluttuinnarnera ilisimavarput, taamaattumik nilliaateqalaarpugut. Mianernartumik inissisimalissanngikkutta ukiut pingasut qaangiutinnginneranni piareersimasariaqarpugut.

Naalakkersuisut itigartitsinerat

Iddimanngiiu Jensen Biancop (IA) erngup nukinganik nukissiorfik pillugu naalakkersuisunut apeqqutit eqqaaneqareersut nassiuppai.

Tamanna attaveqaqatigiinnermut, ineqarnermut, isorliunerusunut upalungaarsimanermullu naalakkersuisunngunnginnerani pivoq.

Naalakkersuisut erngup nukinganik nukissiorfiup allilerneqarnissaa sooq unitsikkallarneraat, taamani apeqqutigaa.

Naaja Nathanielsenip (IA) Iddimanngiiu Jensen Bianco (IA)  Tasiilami innaallagissamik pisariaqartitsisoqarnerulissappat Naalakkersuisut aaqqiissutissarsiorumaarnerat  nukissiornermut siorna naalakkersuisuugallarami akissutigaa. Assi © : KNR, Henriette Simonsen

Nukissiornermut taamani naalakkersuisup Naaja Nathanielsenip (IA)  inuiaqatigiit aningaasaqarnerannut sunniutaasinnaasut 2022-mi misissorneqarneranni, alliliinerup annikitsuinnarmik iluaqutaasinnaanera misissuinermit paasinarsisoq taamani akissutigaa.

- Taamaattumik erngup nukinganik nukissiorfiliorneq innaallagiartortumillu kiassaasersuineq uuliamik kiassarnermit maanna atorneqartumit akisuneruvoq, Naaja Nathanielsen allappoq.

Misissuinerit allat

Nukissiuutinut naalakkersuisoq Jørgen Rosbach (D) Lars Poulsenip (S) paragraf 37 naapertorlugu apeqquteqarneranut, Nukissiorfiit Tasiilami innaallagissamik atuinerulernissamut pilersuisinnaallutik naliliinerat pillugu oktobarimi akissuteqarluni allappoq.  

- Nukissiorfiit missiliuinerat naapertorlugu massakkut nukissiamik pilersuinermi inissiarsuit arfineq pingasut, tamarmik immikkut arfineq marlunnik initallit, tassalu inissiat 56-it pilersorneqarsinnaapput, naalakkersuisoq allappoq. 

Nukissiuutinut naalakkersuisup Jørgen Rosbachip (D) naalakkersuisut, pisariaqartitsineq allanngussappat, erngup nukinganik alliliinissamut suliniuteqaqqissinnaanerat paasissutissiissutigaa.  Assi © : KNR

Jørgen Rosbachip Tasiilami nukissiuutinik siunissami pilersuinissamut misissueqqissaartoqarnera ilanngullugu paasissutissiissutigaa. 

- Misissueqqissaarneq ilaatigut sillimmateqarnermut aamma innaallagissamut aqqusersuutini massakkut atorneqartuni pisinnaasanut tunngasussaavoq.

Misissueqqissaarnerit 2026-p naanerani naammassineqarnissaat naatsorsuutigineqarpoq. Tasiilami innaallagissamik pisariaqartitsineq allanngussappat, erngup nukinganik alliliinissamut suliniuteqaqqissinnaanerat paasissutissiissutigaa.