Politiit ullormut nalunaarutaat: Sisimiuni tillinniaqattaartoqartoq

Ulloq unnuarlu ataatsip iluani tillinniarnerit pingasut. Sisimiuni politiit ulloq unnuarlu nalunaarutaanni taamak isikkoqarpoq.

Nunalu tamakkerlugu tillinniarnerit katillugit sisamaapput, Kalaallit Nunaata Politiivini sillimasut pisortaat Aputsiaq Hansen oqaluttuarpoq. 

- Tillinniarnerit sisamaat Ilulissani pivoq, sillimasut pisortaat oqarpoq. 

- Tillinniarnerit sisamaasut tamarmik niuertarfinni pipput, angerlarsimaffiit eqqorneqanngillat, Aputsiaq Hansen oqarpoq.

Sisimiuni tillinniarnerni pingasuni pinerluttut taakkuinnaanersut oqaatigissallugu siusippallaartoq, sillimasut pisortaat oqarpoq. 

Pinerluttut ilisimaneqanngitsut

Tillinniarnernut pinerluttunik politiit suli pasisaqanngillat.

- Taamaattumik inuiaqatigiinniit unnuap ingerlanerani pasinarsinnaasunik takusaqarsimagunik tusarfigerusuppavut, Aputsiaq Hansen oqarpoq.

Tillinniarfigineqartuni sisamaasuni tillinniat ilisimaneqanngitsut sunik tillisimanersut oqaatigissallugu siusippallaartoq, sillimasut pisortaat oqarpoq.

- Politiit pisut taakkua sisamat suli misissuiffigaat, Aputsiaq Hansen oqarpoq. 

Tillinniarnerit sisamat saniatigut, angerlarsimaffimmi eqqissiviilliornermik, inuit sumiiffimmiitikkusunneqanngitsunik nakuusernernillu pisoqarpoq. Taakkuali sillimasut pisortaata itisilernerunngilai.