Seqernup pulanera Kalaallit Nunaanni: Seqernup pulanerata nunatsinni suminngaanniit takuneqarsinnaanera, sissuigassallu
Pinngortitami qaqutigoortoq tupinnartorlu nunatsinnit aggustip aqqaneq aappaanni pingasunngornermi takuneqarsinnaavoq. Tassani qaammatip seqineq minutsialunnguani assissavaa eqqumiitsumillu sila taarsissaaq.
Nunatsinni sumiluunniit takuneqarsinnaassaaq sumiiffinniilli sumiiffinnut qanoq innikkut pissanersoq qanorlu taarsitigissanersoq assigiissanngillat.
Timeanddate.com-imi allaqqasoq naapertorlugu, nal. 16.37 nunarsuup taarsinerpaaffissaa nallerpagu, seqernup 99,67 procentia qaammammit asserneqassaaq, taannalu Ittoqqortoormiinit taamaallaat takuneqarsinnaavoq.
Seqernup 78,9 procentiata qaammammit asserneqarnera Nuummit nal. 15.30-p 17.39-llu akornanni takuneqarsinnaavoq. Sisimiuni, Ilulissani Aasiannilu seqernup pulanera minutsialunnguanik siusinnerulaartumik takuneqarsinnaassaaq.
Seqernup 93 procentiata qaammammit asserneqarnera Tasiilamit nunaqarfiiniillu takuneqarsinnaassaaq.
Piffissat aalajangersimasut ugguuna takuneqarsinnaapput.
Seqernup pulanera ulloriarsiornermit isigalugu
Kalaallini siullersaalluni ulloriarsiuutut ilinniarsimasoq 28-nik ukiulik Ivalu Barlach Christensen, KNR-imit oqaloqatigineqarpoq.
Seqernup pulasarnera taassuma ima nassuiarpaa:
- Tassa seqinerput nunarsuarminngaanniit 400-riaammik ungasinneruvoq nunarsuarmiit qaammammut ungasissusaaniit. Kisianni taava seqineq 400-riaammik aamma anginerulluni qaammamminngaanniit qilammi takusinnaasatsinni. Taava ilaannikkooriarluni qaammat nunarsuarmut tarranittarpoq, taama oqarpoq, nangillunilu:
- Tamakkiisumilli nunarsuarmut tarraninneq ajorpoq kisianni ilaannikkooriarluni nunap qulaatigut tamakkiisumik qaammatip seqineq assertarpaa. Tassa taamaalilluni seqineq pulasoq takuneqarsinnaalertarluni.
- Qaammat nunarsuarminngaanniit minnerugami taamaattumik qaammatip assiinerani nunarsuaq tamakkerlugu tarraninneq ajorpoq, seqineq ersikkunnaarneq ajorpoq. Aamma nunat aalajangersimasuinnaat ilaannikkut toraartarlugit. Kisianni aamma nunarsuarput annertunerpaamik imaangami, taava seqernup pulasarnera inunninngaanniit takuneqakkajunneq ajorpoq immap qulaatigut taamannak tamakkiisumik tarranittarami.
Isitit illersukkit assiliivillu ilillugu
Oqartussat immikkullu ilisimasallit ataatsimik siunnersuuteqarput: Seqinersiutit nalinginnaasut seqernup pulanerata takunissaanut tamakkiisumik illersuuteqanngillat. Seqinermik takorusuisut tamarmik tulluartunik akuerisanillu seqinersiuteqassapput.
Seqernup tamakkiisumik pulanera toqqaannaq isigineqarsinnaavoq, pissutigalugu qaammatip seqineq asseqqassammagu. Seqineq nuiniariarpat seqinersiutinik illersuusertoqassaaq.
Seqernup pulaneranik assiliisimanngitsut assiliinnginnissaat siunnersuutigineqarpoq.
Seqernup pulanerata kusanartumik assilinissaa ajornakusoorpoq atortullu tulluartut atorneqarnissaat isumannaatsumillu assiliinissaq ilisimaneqartariaqarpoq. Tulluartunik atortuuteqanngikkaanni pulanera takunngitsoorneqarsinnaammat.
Nunap taarsinera qaammatillu seqinermik assiinerata isiginnaarneqarnissaa amerlanernut pitsaanerussaaq.
Scoresbysundip eqqaata imartaani angalaffissaaruttoqassasoq
Seqernup pulanera Tunup avannaata tungaanit kujammut pingasunngornermi ingerlaassaaq, tamannalu pissutigalugu umiarsuarnik takornariartaatinik arlalinnik Blossevillep avinngarusimasumiittup sineriaanut Scoresbysundimullu, nunarsuarmi kangerluit annersaannut takinerpaamullu tikittoqarpoq.
Tamanna Ittoqqortoormiini umiarsuarnik takornariartaatileqatigiiffinnut najukkami ingerlatsisup Mette Pike Barselajsenip Sermitsiamut oqaluttuaraa.
MarineTraffic -imi paasissutissat naapertorlugit, umiarsuarnik 35-nit amerlanerusunik Ittoqqortoormiini maannakkut angallattoqarpoq.
Umiarsuit takornariartaatit arlallit seqernup pulanera inuunermi ataasiaannarluni misigisassatut nittarsaassissutigaat, Scoresbysundillu kangerliumarngisa ilorlerpaartai Svalbardip Tunup Islandillu akornanni angalaarfimmi nuannarineqarluartumi, maanna aqqusaarneqarput.
Seqernulli pulanera minutsialunni taamaallaat tamakkiisumik takuneqarsinnaassaaq - seqernullu pulanerata minutsit marluk sekundillu 18-it tamakkiisumik sivisussuserissavaa.
Pisartoq piuartarnavianngitsoq
Astrofysikerip Ivalu Barlach Christensenip malugeqquaa, pisartoq tamanna seqineq ukiorpassuit qaangiuppata pulasarunnaartalerpat pisarunnaarumaartoq.
- Siusinnerusukkut eqqaariikkattut qaammat seqinermit 400-riaammik maanna mikineruvoq, qaammammulli ungasissusaa 400-riaammik aamma mikineruvoq, tamannalu pissutigalugu taakkua qilammi angeqqatigiippasipput, naak angissusaat ungasissusaallu assigiinngilluinnaraluartut.
- Qaammalli nunarsuarmit centimeterialunnik ukiut tamaasa ungasilliartorpoq. Taamaattumik nunarsuarmit arriitsumik ungasilliartorpoq. Qaammat ukiut millionilikkaat qaangiuppata ungasinnerussaaq, taamaattumik qilammi mikinerorpasilissaaq. Seqineq tamakkiisumik assersinnaanavianngilaa, Ivalu Barlach Christensen oqarpoq.
