Eqqaaniut: Sarah Woodall
“Kalaallit Nunaat qanoq nassaaraajuk? Uanga nassaarinngilara taassuma nassaaraanga.”
Taamak Sarah Woodallip assingani 2017-imeersumi allaqqavoq. Assi taanna “Ildsjæl”-imik taaguuteqartumi assini katersani asserpassuit allat akornanniippoq.
Asserpassuit akornganni taanna assi ataasiuvoq. Inoqatinut attaveqaqatigiittarfimmi quppernerani assilisarpassuanik peqarpoq aamma Kalaallit Nunaallu pillugu allagaararpassuaqarpoq – pingaartumik Kalaallit Nunaata kujataa pillugu.
“ Nunarsuaq angalaffigisimagunaraluaqaara kisianni allamiinnissanninngarnit Kalaallit Nunaata kujataaniikkusunneruvunga – nunaga.” (2023)
ukiut 13-it sinnerlugit Sarah Woodall toqussi tikillugu Kalaallit Nunaanni najugaqarpoq, najugaqarfini nuannareqalugu suliffigaa. Nunatsinnut asanninnera assini tamaginni allalaarnermigut qungujulanermigullu ersersittarpaa.
Ilungersuussilluartup ullorsiutai
Sarah Woodallip nuannarilluakkaminut ingerlatitseqqiinissaminut immikkuullarissumik piginnaaneqarpoq. Nittartakkakkut quppernermini ullorsiutinik allattartuunikuuvoq, videoaqqanik saqqummiusisartuunikuuvoq, ilanngutassianik allattarnikuuvoq, Kalaallit Nunaata kujataani takornariaqarnermik suliaqarnermini apeqqarissaarnernuttaa peqataasarnikuuvoq, ukiunilu kingullerni tallimani Innovation South Greenland A/S-imi sulisimavoq.
Facebookikkut allatami ima allaatigineqarpoq:
” Sarah Amerika Kujallermi inunngorpoq USA-milu peroriartorsimalluni, kalaaliusutulli misigisimasuusimavoq. Kalaallisut oqaatsivut kulturerpullu ilikkarsimavai, kalaalimininngersuusimallunilu. Kujataa, nuna, oqaluttuarisaanerput maanilu inuit itisuumik misigissuseqarfigisimavai.”
Taanna maluginiarneqarsinnaavoq –suliniutinik piviusunngortitseqataanerinnakkuunngikkaluartoq, kisianni aamma inuttut qanoq ittuunermigut ersersitsisarluni tassa: tunniusimasoq, qunusuitsoq, aammalu inuit allat qaffassarnissaannut kissaateqartuusoq.
Living life to the fullest
Sarah Woodall Amerikap kujataani inunngorpoq, USA-milu peroriartorluni. Angerlarsimaffinili uummateqarfinilu Kalaallit Nunaanni nassaarai.
Taalliortup atuakkiortullu Paulo Coelhop Brasiliameersup allataanik issuaalluni Instagramikkut quppernermini Polarphile-mi ukioq 2023-imi siammarterpai:
” One day you will wake up and there won’t be any more time to do the things you’ve always wanted. Do it now.”
Tassunga ilanngullugu nammineq allappoq:
“ Qujanartumik inuuneq nuannarisara aallulluinnarsimallugu isumaqarpunga!”
Taamaapporlu. Ammasumik uummateqarluni alapernaassuseqartuullunilu.
Immaqa inuunerup sivisussusia ataaseq naammannavianngitsoq ilisimareersimavaa:
“ Kalaallit Nunaanniissaanga. Aamma inuunerma tulliani, aamma pingajuani aamma sisamaani”
Tamaanimiuuvormi. Tamaanilu sunniuteqarnera ingerlateqqinneqassaaq – pinngortitami, oqaluttuani inunnilu ilisimannittuni.
