Ilinniagaqartut akikitsumik angalasinnaalerput
Nuummut timmisartumik angalalluni siumut utimullu bilitsi 1000 koruuninik akeqartoq atorlugu, Danmarkimi ilinniagaqartunut maanna periarfissaalerpoq.
Tamanna ukioq kingulleq novembarimi akuersissutigineqarpoq, periarfissarlu tamanna Danmarkimi aningaasaliissutit pilersaarutaanni 2025-mut suliniutinut ilaavoq. Tassani 6. million koruunit immikkoortinneqarput ilinniagaqartut Kalaallit Nunaannut attuumassuteqarnerulernissaat anguniarlugu.
Periarfissaq marlunngornermi atuutilerpoq.
IA-meersup Folketingimi ilaasortap, Aaja Chemnitzip, 1000 koruuninik akeqartumik bilitsimik periarfissiineq immikkut sulissutigisimavaa, tassanilu ilinniagaqartut nunatsinni angerlarsimaffimminnut attaveqarnerulernissaat pingaartissimavaa.
- Danmarkimi ilinniagaqareerlutik angerlartartut kisitsisitigut 56 procentiinnaasut ilisimavarput. Taamaattumik kissaatigaarput nunatsinniit Danmarkimi ilinniagaqartut nunatsinnut attaveqarnerat annertunerulissasoq, Aaja Chemnitz KNR-imut novembarimi oqarpoq.
Piffissami sivisunerusumi nunatsinnut iluaqutissaq
Københavnimi Kalaallit Illuat aqqutigalugu, Ilinniagaqartut bilitsimut 1000 koruuninik akilimmut qinnuteqarsinnaapput. Tamanna ukiut tamaasa kalaallinut ilinniagaqartunut atuuttartoq – frirejse – saniatigut periarfissatut atorneqarsinnaalissaaq.
Bilitsi 1000 koruunilik Nuummut angalanissamut immikkut suliarineqarpoq. Tassa imaappoq Nunatsinni allamut angalaniaraanni nammineq akilerneqartariaqartoq.
Avalak – Danmarkimi kalaallit ilinniagaqartut kattuffiat – nutaamik periarfissaqalernera nuannaarutigaat, kisiannili bilitsi akikinnerusoq nunatsinni tamarmiusumi atuutsinneqanngimmat siusinnerusukkut isornartorsiorpaat.
– Tamanna ilinniagaqarnerup nalaani kingornalu nunatsinni attaveqarnerulersitsisinnaassasoq isumaqarpungut. Kiserliornermik annikillisitsisinnaasoq kiisalu ilinniagaqarnerup nalaani atugarissaarnermik ineriartortitsisinnaasoq upperaarput. Tamanna eqqarsaatigalugu Kalaallit Nunaannut iluaqutaassaaq, decembarimi Avalaap siulittaasua, Najana Kristensen oqarpoq.
ilanngullugu nangippoq:
– Kalaallit ilinniagaqartut tamarmik naligiimmik bilitsimik akikitsumik pissarsisinnaanermut periarfissaqarnissaat Avalaammit kissaatigaarput.
Danmarkimit Nuummut uterlugulu bilitsi ulluni kingullerni 6000-it 7000-illu koruunit akornanni akeqartartoq, Air Greenlandip nittartagaanut iserluni takuneqarsinnaavoq.
