Inatsisartut Allattoqarfiat nutaamik pisortartaarpoq
Inatsisartut Siulittaasoqarfiat aalajangerpoq Steen Lynge (D) Inatsisartut Allattoqarfianni pisortanngussasoq, tusagassiutiniut nalunaarummi saqqummiunneqarpoq.
- Steen Lynge 61-inik ukioqarpoq Nuummilu najugaqarluni. Ulloq 1. august 2025 atorfissaminut inississaaq Inatsisartut Allattoqarfianni ukiorpassuarni pisortaasimasoq Ellen Kolby Chemnitz soraarninngorsimasoq kingoraarlugu.
Steen Lynge politiitut ilinniarsimasuuvoq, ukiorpassuilli politikkip iluani sulereersimalluni. Steen Lynge, Atassummi ilaasortaanermini peqqissutsimut attaveqaqatigiinnermullu 2013-imiit 2014-imut naalakkersuusimasimavoq.
Steen Lynge 2017-imi Atassummit tunuarluni Demokraatini ilaasortanngorpoq. Partiimut nutaamut ilanngunnermigut 2020-mi siulittaasutut atorfinippoq, tassanilu Namminersorlutik Oqartussat sinnerlugit Naalakkersuisuni ilaasortaanermini Nunanut allanut tunngasunut Nukissiuuteqarnermullu naalakkersuisunngorpoq.
Pisortassatut atorfimmut soqutiginnittut amerlasimapput. Taamaakkaluartoq Steen Lynge toqqarneqarsimasoq. Pisortani aqutsinermik ingerlatsinermillu ilisimasaqarluarluni misilittagaqarluarnera, toqqarneqarneranut tunngaviusoq tusagasssiutinut nalunaarummi allassimavoq.
- Pisortanngortussaq Steen Lynge, ullumikkut Naalakkersuisut qitiusumik allaffeqarfissuanni suliffeqarnermut ilinniartitaanermullu immikkoortortami pisortaavoq. Steen Lynge taamaalilluni ilaatigut pisortat ingerlatsiviinit allaffissornermik misilittagaqarluarpoq Inatsisartunilu inatsisartutigoortumik sulinermik ilisimasaqarluarluni, tusagassiuutinut nalunaarummi taama allassimavoq.
