Politiit pisortaat: Sakkut pillugit inatsit sukannernerusoq inunnik qularnanngitsumik annaassissutaassaaq

Angut tarnimigut napparsimasoq Narsami siorna aallaasersorpoq.

Taassuma inuit illup qaaniittut, illu, qulimiguulillu tikilluinnalersoq seqqortaarfigai. Taanna sapaatit akunnialuisa matuma siorna eqqartuunneqarami inunnik 14-inik toqutseriarsimasutut eqqartuunneqarpoq.

Aallaasersungaatsiarnerli nunatsinni politikerit sakkut pillugit inatsimmut sukateriniarnermut 2018-imili uninngatiinnarneqartumik suliaqarniarlutik sukkanerusimagaluarunik immaqa pinngitsoortinneqarsinnaasimassagaluarpoq. Sukaterisoqarneratigut sakkut parnaarsimasumiitsinneqartussaapput.

Nunatsinni sakkut pillugit inatsit sukaterneqarpat aallaasinik atuinermi pinerluuteqarnerit qularnanngitsumik annikinnerussasut, Kalaallit Nunaanni Politiit pisortaat, Bjørn Tegner Bay isumaqarpoq. Aap, immaqalu allaat inunnik annaassisoqarsinnaassaaq.

- Sakkut pillugit inatsisip sukaterneratigut pisut ilungersunarluinnartut immaqa pinngitsoortissinnaagaluarigut eqqarsarpugut. Suliat aallaasersortoqangaatsiarneranut tunngasut. Inuit imminut toqunnissamik eqqarsaateqarnera. Tarnikkut napparsimasut, pingaartumilli meeqqat akornanni aallartoornerit, Bjørn Tegner Bay oqarpoq.

Kalaallit Nunaanni Politiit taamaattumik aallaasit piniarnermut atorneqanngikkaangamik parnaarsimasumiitsinneqartalernissaat piumasaqaataassasoq innersuussutigaat. Tamannami susassaqanngitsut sakkunik atuisinnaanissaannut atornerluinissaannullu ajornakusoornerulersitsissaaq.

Narsami aallaasersungaatsiartoqarnera assersuutissatsialaavoq.

Aallaasinik ajutoornerit pinerluuteqarnerillu politiit ulluinnarsiutigigaat

Suliaq taanna poorskinngitsiartoq eqqartuussivimmi suliarineqarpoq. Unnerluutigineqartup – maanna eqqartuunneqarsimasup qoorortuuaraq aallartittariaannaq umiarsualivimmi aalisariummit tillittariaannaallugu ilisimasimallugu eqqartuussivimmi oqaatigaa.

- Pisoq taannarpiaq pinngitsoortissinnaasimagaluarnerlugu oqaatigisinnaanngilara. Kisianni inatsimmik sukaterigutta taama pisoqarsinnaaneranut ilimanannginnerlersitsisinnaanissatsinnut assersuutissatsialaavoq, Bjørn Tegner Bay oqarpoq, itisiliillunilu:

- Pisumimi tassani inuup aallaat piginngisani pissarsiarisinnaavaa, taannalu sumut tamaanga inuillu aalajangersimasuunngitsut sussuseqanngitsut qulimiguullillu tungaanut eqqarnerminut atorsinnaasimallugu.

Narsami pisoq ilungersunarluinnartoq pinerluuteqarnernut aallartoornernullu assersuutissani kisiartaanngilaq. Kalaallit Nunaanni Politiit oqarnerat naapertorlugu tamanna ullut tamangajaasa pisarpoq. 2023-rnarmi aallaasinut tunngatillugu suliat 77-iupput.

Aggustimi pisoq, tassa meeqqat pingasut Qasigiannguani umiarsualivimmi qoorortuunik pingasunik tilleriarlutik qimmilivimmut umiatsiariarlutik qimmuttut qulit aallaallugit toqutsinerit aamma assersuutissaavoq.

Suliaq alla Qasigiannguaneersoq angutip inuusuttup 17-inik ukiullip inuit arlallit toqunnissaannik sioorasaarmagit nalaatsornerinnakkullu takusaminut seqqortaarnera kingornalu angummik 61-inik ukiulimmik toqutsinera aamma assersuutissaavoq.

Sakkut pillugit inatsit ukiuni arfinilinni pujoralammik katersiinnartoq

Suliat taama amerlatigitillugit politikerit sakkut pillugit inatsisip sukaternissaanut iliuuseqaqqissimannginnerat eqqarsarnartoqarsinnaavoq.

Pingaartumik naalakkersuisut partiillu sinneri Inatsisartuniittut sukaterinissap pisariaqarnera isumaqatigalugu arlaleriarlugu oqaatiginikuugaat eqqarsaatigissagaanni.

Taakku tamanna kingusinnerpaamik KNR-imut siorna oqaatigaat:

Taamani aalisarnermut piniarnermullu naalakkersuisoqarfiup sakkunik toqqorsimasuutitaqartarnissamut apeqqut 2024-mi upernaakkut ataatsimiinnermi aalajangiiffigissagaat naatsorsuutigineqartoq KNR-imut oqaatigaa. Upernaakkullu ataatsimiinnermi ullormut oqaluuserisassat misissoraanni tassunga tunngasoq salliunneqanngilaq.

Piniarnermut aallaaniarnermullu inatsisip nutaap sakkut pillugit inatsimmut tunngaviusussap akuerineqaqqaarnissaa maannamut nassuiaatigineqartarsimavoq. Piniarnermulli aallaaniarnermullu inatsit ukioq ataatsip matuma siornali akuerineqarpoq.

KNR-ip tassunga atatillugu akisussaasutut naalakkersuisoq, Kim Kielsen (S) sakkut pillugit inatsit sooq salliutinneqannginnersoq apererusukkaluarpaa, taannali apersorneqarusunngilaq.

Taassumalu Inatsiseqarnermut ministereqarfik innersuussutigaa.

Inatsiseqarnermut ministereqarfiup Inatsisartut piniarnermut aallaanermullu inatsimmik atuutsitsilernissaat 2019-imili utaqqilersimallugu KNR-imut akissutigaa. Taamaammat ministereqarfik sakkut pillugit inatsimmik nutaamik piareersaarnissamut aatsaat 2023-mi nalunaarfigineqarsimavoq:

- Naalakkersuisut piniarnermut aallaaniarnermullu inatsisip akuerineqarnerata ilassutaatut ministereqarfiup Kalaallit Nunaanni sakkut pillugit inatsimmik misissueqqinnissaa saqqummiussinissaalu piumasaatigaat, Inatsiseqarnermut ministereqarfik KNR-imut allappoq.

Aalisarnermut piniarnermullu naalakkersuisoqarfiup sakkut pillugit inatsit nutaaq 2024-mi ukiakkut ataatsimiinnermi oqaluuserisassaniinnissaa naatsorsuutigineqartoq allappaa. Tassa sakkut pillugit inatsip nutaap sulissutigilerneranit ukiut arfinillit qaangiuttullu.