Qulisamik arsaaffittaarnissaq silaannaleqqippaat
Airdomes.
Oqaaseq taanna Nunatsinni arsaannermik soqutigisaqartut tusakulanerulissavaat. Airdomes tassaapput timersornermut atortunik qulisaliornermut atortut. Iikkat qilaarlu atortussianik qituttunik sanaajupput silaannaap naqitsinera atorlugu makitatinneqartut.
- KAK-miit ukiariartornerani airdomes pillugit kommunenut namminersorlutillu oqartussanut saqqummiinikuuvugut arlallillu airdomes pillugit paasisaqarnerunissamik soqutiginnipput. Taamaattumik KAK-miit piareersarsimavarput paasisassarsiorluni angalanissaq, Kalaallit arsaattartut kattuffianni ineriartornermut siunnersorti Nike Berthelsen KNR-imut oqarpoq.
Nunatsinni timersornermiit, kommuneniit namminersorlutillu oqartussaneersut ilagalugit maanna Finlandimiipput airdomes takullugillu saqqummiivigitissallutik, taakkulu sila issikkaluartoq kialaarlutik maanna timersorfiupput. Inatsisartut kulturimut ilinniartitaanermullu ataatsimiititaliaat angalaqatigiinnut tallimanngornermi ilanngullutik airdomesinik takuniaapput.
- Assersuutigalugu arsaattarfik takuniarparput silami qulinik issittooq. Meerarpassuit silami arsaateriaatsimi sungiusarput qulit missiliorlugit kiattumi. Taamaasillutik silami arsaateriaatsimi sungiusarsinnaaneq sivitsorsimavaat, Nike Berthelsen oqarpoq.
- Nunatsinni silami arsaanneq qaammatit pingasut sisamat sivisussuseqarpoq kingornalu illup iluani arsaannermut nuuttarluta. Airdomes atulersinnaappata silami ukioq kaajallallugu arsaateriaaseq aallunneqarsinnaalissagaluarpoq, Nike Berthelsen oqarpoq.
Arsaanneq sivisunerusoq
Airdomesiliortoqassappat arsaaffinnik qulisanik KAK piginnittuussanngilaq. Arsaaffiit akiinut apeqqutaassaaq piginnittut aaqqiissut qanoq ittoq atorusunneraat.
- Qulisaq takusarput atisalersortarfeqarpoq kioskeqarluni taamaasilluni peqatigiiffiup illuutaatut atorluni. Isiginnaartunut inissaqartut takusartussaagatsigit pissangavugut. Soorunami anorersuarnut apummullu akiuussinnaasunik aaqqiissutissanik ujarlissaagut. Naatsumik oqaatigalugu; Nunatsinnut naleqquttunik, Nike Berthelsen oqarpoq.
Ukiorsuaq qaangiukkaangat Nunatsinni seqinersuaq kaaviinnalersarpoq. Arsaaffinni ivigaasaaqqanik qallikkani arsaanneq ulloq unnuarlu ingerlalersarpoq imaliliornera pueqqortinneralu pissutigalugit illup iluani futsalimut nuunnissaq sioqqullugu.
Airdomes aamma aasakkut pullaarneqarsinnaapput taamalu silamiivilluni arsaattoqarsinnaalluni.
- Apeqqutaavoq aaqqiissut qanoq ittoq piginnittup piumaneraa. Ilaasa airdomes ukioq kaajallallugu silaannaqartittarpaat allat aasaanerani pullaarsigallartartut. Uagut KAK-miit ajorinngilarput airdomes ukioq kaajallallugu pullassimasinnaappata. Kisianni kommunet aalajangertussaavaat aaqqiissut qanoq ittoq perusunnerlugu. KAK aamma piginnittuunavianngilaq. Aallartisaanermi ikiuutiinnartussaavugut, Nike Berthelsen oqarpoq.
Aningaasalersornera
Arsaannermi sinaakkutit silaannarmit napatinneqartut atulissappata aningaasalersornissaa inissinniagassat ilagaat.
- Uagut KAK-miit Danmarkimi arsaattartut kattuffiata DBU-p ingerlataa Hele Danmarks klubhus pillugu oqaloqateqarpugut tassunga eqqaanartumik aningaasalersuisoqarsinnaaneq eqqarsaatigalugu, Nike Berthelsen oqarpoq.
Periarfissaq iluatsillugu Finlandimi arsaattartut kattuffiat KAK-mit ataatsimeeqatigineqarpoq futsalimi suleqatigiinneq pillugu nunat tamalaat unammisarneranni Finland qaffasissumik inissisimammat.
