Naalakkersuisut siuttuisa Donald Trumpip, Jens-Frederik Nielsenip Mette Frederiksenillu isumannaallisaanikkut isumaqatigiissummik atsiornerannit piffissaq sivikitsoq qaangiummat, Trump nunarput pillugu nammineq attaveqaatini atorlugit saqqummiusseqattaaqqilerpoq. 

Amerikamiut præsidentiata isumaqatigiissut Daltonimi qinersisartunik qanittukkut ataatsimiisitsisoqarnerani ima taagorpaa: ”ilimanarpoq illunik tuniniaanerit annersarisiginnaassagaat”.

Præsidenti nunarput pillugu sapaatip akunnerata siuliani aamma oqarpoq: ”USA-p tigoriaannanngorpaa”.  

Trump Truth Socialikkut aamma sapaatip akunnerata siuliani allappoq: ”Kalaallit Nunaanni pigisatsinni kusanartumi uuliasiornissamut, gassisiornissamut aatsitassarsiornissamullu misissuisoqarnissaanut piareersartoqaleruttorpoq”. 

Dansk Institut for Internationale Studierimi Amerikamiut nunanut allanut politikkiannik ilisimatusartuunerup Rasmus Sinding Søndergaardip oqarneratut, oqaaseqaatit Amerikamiunut tusarnaartunut saqqummiunneqarput. 

- Trumpip isumaqatigiissut piviusumit annertunerusutut nunaminut saqqummiutissallugu pisariaqartippaa. Kalaallit Nunaannik tiguaarusulluni kissaatigisimasamisulli ittunngortinniarsaraa. 

Ilisimatusartuunerup Trumpip oqaatigisai isumaqatigiissutip imarisaanut naapertuutinnginnerat aamma erseqqissaatigaa. 

Nunatsinnimi nunarput pillugu oqartussaassuseqarpugut, tassani nunatta pisuussutaasa piiarneqarnissaannut akuersinissaq aamma ilaavoq.

- Isumaqatigiissut Trumpimut pingaaruteqarpoq, tassami USA-p oqartussaassuseqarneranik akornuteqanngitsumillu qanoriliorsinnaaneranik oqaluttuarnissaminut periarfissiimmat. Taamatummi kissaateqarsimagaluarpoq, Rasmus Sinding Søndergaard oqarpoq. 

Isumaqatigiinnginneq akerleriissutaasinnaasoq

Ilisimatusartuunerup oqarneratut, isumaqatigiissut piviusunngortinneqartussanngorpat, præsidentip oqaasii isumaqatigiinngissutaalersinnaapput akerleriissutaalerlutillu. 

- Amerikamiut suliffeqarfii pisuussutinik piiaanissamut akuersissutinik qinnuteqarpata atorfilittanillu qinnuteqaatit itigartitsissutigineqarpata akerleriissuteqartoqalersinnaavoq, tassanilu Trump kimigiisilersinnaalluni. 

Isumaqatigiissut erseqqissumik allassimagaluartoq, Trumpip saqqummiussineri, qanoq piumasaqartigissaneranik nalornisitsipput, Ramus Sinding Søndergaard naliliivoq.

- Isumaqatigiissut erseqqippoq qanorli imaqarnera assigiinngitsunik nassuiarneqarpoq. Donald Trump præsidentiutillugu, isumaqatigiissut qanorluunniit allaqqangaluarpat USA-p isumaqatigiissummi nammineq paasisimasamisulli kimigiiserfiginninnissaa naatsorsuutigineqarsinnaavoq. 

Donald Trumpip, Mette Frederiksenip Jens-Frederik Nielsenillu isumaqatigiissut New Yorkimi atsioraat.  Assi © : Kylie Cooper/Reuters/Ritzau Scanpix

Taamaattumik ilisimatusartuunerup oqarneratulli nunatta Danmarkillu Amerikamiut isumaqatigiissutigineqartut malillugit iliortinnissaat qulakkeertariaqarpaat.

- Imaanngilaq Trumpip iliuuseqarnissamik oqalunneri piviusunngortinneqassasut. Isumaqatigiissummimi USA-p iliuuserisinnaasaanik erseqqissunik malittarisassaqarpoq, Rasmus Sinding Søndergaard oqarpoq. 

Isumaqatigiissut Inatsisartuni oktobarip 12-ianni siullermeerneqarpoq. Inatsisartullu Nunanut Allanut Sillimaniarnermullu Ataatsimiititaliaanut suliassanngortinneqarluni. 

Folketingimi ilaasortat isumaqatigiissut aamma suliarissavaat. Folketingimilu sisamanngornermi novembarip 12-ianni siullermeerneqassaaq.