Ullormut nalunaarut: Politiit angutip inuusuttup saassunneqarneranut ujajaaffigineqarneranullu ilisimannittussarsiortut

Angut 24-nik ukiulik inuusuttunit eqimattanngoqqasunit ataasinngornermi ullup-qeqqanut saassunneqarpoq.

Kalaallit Nunaanni Politiit angut inuusuttunit amerlanerusunit eqimattanngoqqasunit Nuummi H.J. Rinksvejimi ujarneqartoq pillugu nalunaaqutaq 13.59 nalunaarfigineqarput:

- Inuusuttut eqimattanngoqqasut angutip aningaasivia nalillillu allat piumasimavaat tamatumalu kingorna isimmittarlugu annersarlugulu saassuppaat, Kalaallit Nunaanni Politiit Facebookikkut taama allapput.

Kalaallit Nunaanni Politiit sillimasuisa pisortaat Jeppe Andsager, politiit pisumut ilisimannittunik suli ujaasisut, marlunngornermi ullaakkut oqaluttuaraa.

Pingaartumik blok 8-p blok 9-llu eqqaaniissimagaanni takusaqarsimagaannilu politiinut saaffiginnittoqarsinnaavoq. 

Uulia kuuttoortoq tillinniarnerlu 

Tasiilami Attertup Nuuani uuliap kuuttoorsimanera ataasinngornermi unnukkut aamma nalunaarutigineqarpoq. 

- Benziinap kuuttoorsimanissaa naatsorsuutigineqarpoq, Jeppe Andsager oqaluttuarpoq:

- Qatserisartut milluaat 40 meterinik takissusilik sumiiffimmut iliartornikuaat.

Tamatuma saniatigut Nuummi Aqqusinersuarmi pisortat allaffiannut marlunngornermi unnuap qeqqata qaangilaarnerani tillinniartoqarsimavoq. 

- Inuup igalaaq sequmeriarlugu illup iluanut isilersoq nalunaarutigineqarpoq, Jeppe Andsager oqarpoq:

- Taava tasamunnartitsivugut inullu suliami pasillerneqartoq tigusaraarput.