Politikerit arlallit Danmarkimut tikeraarneq isornartorsioraat: Pituttoqqinneruneq

Naalakkersuisut siulittaasuat, Jens-Frederik Nielsen danskit ministeriuneranut, Mette Frederiksenimut  sapaatip akunnerata siuliani tikeraarnerani qungajulasoqarlunilu assiliisoqaqattaarpoq.

Tikeraarnerali nunatsinni politikerinit arlalinni maanna isornartorsiorneqarpoq.

Naleqqamit Jens Napãtôk aamma Inuit Ataqatigiinnit Mariane Paviasen tikeraarneq pillugu naalakkersuisunut §37 aqqutigalugu arlalinnik apeqquteqarput.

Taakku naalakkersuisut siulittaasui marluk ataatsimiinnerminni qanorpiaq oqaloqatigiissimanersut paaserusuppaat, aamma naalakkersuisut ataatsimiinnginnermi akuutinneqarsimanersoq soorlu naalakkersuisoqatigiit ataatsimoortinneqannginnersut paaserusuppaat.

Taakku naalakkersuisunut siulittaasut marluk Københavnimi tusagassiortunik katersortitsinerani Namminersorneq pillugu inatsit ilaatigut oqaatigimmassuk tassunga apeqquteqaateqarput.

Oqaatigineqartut Jens Napaattuup isumaqatigiinniarnerit aallartinneratut paasivai.

- Inatsisartut qinigaarlaat avaqqutiinnarlugit taakku pisinnaatitsissummik tunniusseqqaannginneranni aallaaveqartumik isumaqatigiinniartoqalernera tupinnarpoq. Minnerunngitsumik tunuliaqutai Siumukkut qisuariarnerat, Inuit Ataqatigiillu inatsisartuni ilaasortaatitaasa qisuariarnerat takutiinnarpaa tunuliaqutaqarani maannakkut siunnerfeqarneq imaannaanngitsorujussuusoq, Jens Napãtôk’(N), Naleqqameersoq, KNR-imut sapaatip akunnerani siusinnerusukkut oqarpoq.

Siumumit Jess Svanep isornartorsiuineq aallartippaa, taassuma naalakkersuisuni siulittaasut marluk Namminersorneq pillugu inatsimmut allannguisoqarsinnaaneranut atatillugu oqaaseqartoqarnera ernumassutigalugu sapaatip akunnerata siuliani oqaatigaa.

- Namminersorneq pillugu Inatsit nunat marluk akornanni isumaqatiginninniutissaanngilaq. Inatsit tassaavoq inuiaat Kalaallit piumasaannik ersersitsisoq taamaallaallu inuiaqatigiit Kalaallit pigisaat allanngortissinnaasaallu, Siumumit politikeri tusagassiuutinut nalunaarummi oqarpoq.

Isumaqatigiinniartoqanngitsoq

KNR-ip Jens-Frederik Nielsen suliamut atatillugu apersorniaraluarpaa, tamannali periarfissaanani. Naalakkersuisulli siulittaasuata Namminersoq pillugu inatsimmik Danmark isumaqatiginialersimanagu tusagassiuutinut nalunaarummi erseqqissaatigaa.

Siulittaasulli marluk naalakkersuisoqatigiinnissamut isumaqatigiissummi nutaami anguniakkat oqaluuserisimagitsik allappaa.

Naalakkersuisut aalajangiisinnaagunik Namminersorneq pillugu inatsit ullumikkutut itsillugu peqqissaartumik misissorneqarnissaanut piffissanngorpoq. Namminersorneq pillugu inatsit misissoqqinneqassasoq, Demokraatit, Inuit Ataqatigiit, Atassutip aamma Siumup naalakkersuisoqatigiinnissamut isumaqatigiissutaanni allassimavoq.

Tamannalu danskit tungaanniit akuersorneqarpoq. Mette Frederiksenip Namminersorneq pillugu inatsisip misissorneqarnissaa immaqalu nutaamik sanasoqarnissaa piareersimaffigalugu tusagassiortunik sapaatiummat katersortitsisoqarnerani oqaatigaa.

Innuttaasut ilanngutitinneqassasut

Oqaatigineqartulli Jens Napaattuumit nuannaarutigineqanngillat.

Taasumali naalakkersuisut siulittaasuat innuttaasut qulangerlugit iliuuseqarsimasoraa.

- Alloriarneq ersarilluinnartoq naluara qunusuinnertut taaneqartariaqarnersoq, uanga akerlianik Qallunaat Nunaannut pituttoqqinnertut taarusunneruara, Jens Napãtôk’, Naleqqameersoq, KNR-imut oqarpoq.

KNR-ip Siumup siulittaasua, Vivian Motzfeldt apersorniarsarigaluarpaa. Siumut isornartorsiuinermi Jess Svanep aallartitaani sumi inissisimanersoq paaserusukkaluarparput. Ukiorpassuarni politikeriusimasoq Inatsisartunut marsip aqqarnani qinersisoqarmat qinigaaqqinngilaq.