Pisut imigassartorsimanermut attuumassutillit pillugit ulloq unnuarlu ulapiffiungaatsiaqqittut

Politiit unnuaq ulappupput, sillimasut pisortaat Aputsiaq Hansen ulloq unnuarlu kingulleq pisut nassuiaatigalugit arfininngornermi ulloqeqqata-tungaani oqarpoq.

Nuummi Nuussuartaani pisiniarfiup quersuanut tallimanngornermi ullornerani tillinniartoqarpoq, nioqqutissarpaalussuillu tillinneqarlutik.

- Suliami politiit pasisaqarput misissuisoqarallarporli suli, sillimasut pisortaat paasissutissiivoq.

Tamatuma saniatigut Nuummi mittarfimmut Tuukkamut ilaallutik tikittut inuit marluk, hashimik eqqusseriaraluartut ilanngaaserisunit tigusarineqarput.

Ilaasup aappaata nassataminiittuutini pillugu unnerluutigineqarpoq, aappaalu hashimik iioraasimanissaanik pasitsaanneqarluni tigusarineqarpoq.

- Isertitsivimmi unnuisinneqarpoq, timaani ilormiorisinnaasai tamakkerlugit isumannaarpavut.

Hashi qanoq annertutiginersoq sillimasut pisortaata ilisimaqqissaanngilaa, ilormioqangaatsiartorli paasissutissiissutigaa.

Pineqartoq tamatuma kingorna unnerluutigineqarpoq, kingornalu isertitsivimmiit iperagaavoq. Eqqartuussisoqarnissaalu politiinit maanna utaqqimaarneqarpoq.

Imigassartorsimatilluni biilimik ingerlatsineq ajutoornermik kinguneqartoq

Nuummi suliat taakkua marluk saniatigut politiit pisunut imigassartorsimanermut attuumassutilinnut amerlasuunut ornigupput – Nuummi nunallu sinnerani.

Nakuusernerit, angerlarsimaffimmi eqqissiviilliornerit, kannguttaatsuliornerit, isumaginninnikkut suliat, aqqusinermi eqqissiviilliornerit aamma angerlarsimaffinni meerartalinni eqqissiviilliornerit arlaliupput – suliat ilaat oqaatigalugit.

Sisimiuni imigassartorsimatilluni biilimik ingerlatsineq ajutoornermik ullumimut unnuaani kinguneqarpoq arlallit ajoquserlutik.

Politiit biilimik ajutoortoqarneranik nalunaaqutaq 00.52 nalunaarfigineqarput. Biili pingasunik issimasulik ajutoorsimavoq.

- Politiit anngummata ambulanceni sulisut ajoqusersimasut passutilereersimavaat, Aputsiaq Hansen oqaluttuarpoq.

Angut taanna aquttuussangatinneqartoq imigassartorsimasorlu politiinit tigusarineqarpoq.

- Angut taanna tigusarineqarpoq, napparsimmavimmilu aaversilluni. Tamatuma kingorna iperagaavoq, sillimasut pisortaat oqarpoq.

Biilimi issimasut marluk napparsimmavimmut passunneqariartorlutillu ajoqusernerminnik misissortikkiartorput. Timimikkut anniaateqangaatsiarput.

Soorlu sapaatip-akunnera kingulleq politiit sulianut 55-init ikinnerunngitsunut tallimanngornermiit arfininngornermut orniguttariaqarsimapput, taamaattumik ajutoortoqaqqunagu imigassartornerup aqussinnaanissaa politiinit kaammattuutigineqaqqippoq.

- Inuit imigassartorpallaarsimatillutik imminnut allanullu ulorianartorsiortitsinermik kinguneqakkajuttarpoq, sillimasut pisortaat oqarpoq nangillunilu:

- Pisut oqaatigisakka tamangajalluinnarmik imigassartorsimanermut attuumassutiliupput. Biilimik ajutoortoqarnera ilanngullugu.

Taamaattumik imigassartorpallaarnaveersaarnissaq imigassartorsimatillunilu biilimik ingerlatsisoqannginnissaa Aputsiaq Hansenip kaammattuutigaa.