Pinerluuteqarsimasut ukiuni 16-ini inissiisarfimmiittussanngorsinnaalissapput

Eqqartuussiviit ilungersunarnerpaamik pinerluuteqarsimasut soorlu toqutsinerit, sakkortuumik nakuusertoqarsimatillugu kiisalu aanngajaarniutinut tunngasunik pinerluuteqarsimasorujussuarnut ukioq 2026 jannuaarip aallaqqaataaniit ukiuni 16-ini pinerluuteqarsimasunut inissiisarfimmiittussanngortitsisinnaalissasut.

Inatsit Atuutsinneqarnerannut Naalakkersuisoqarfik tusagassiuutinut nalunaarummi allappoq.

Pineqaatissiisarnermi killigititaq manna atuuttoq sivisunerpaamik ukiuni quliniippoq.

Inatsisartut inatsisissatut siunnersuutaat ukiaanerani ataatsimiinnerminni akerliusortaqaratik akuerimmassuk, suliaq Folketingimi maanna naammassineqarpoq. Tamanna pivoq nunatsinni Inatsit Atuutsinneqarnerannut akisussaaffik Danmarkimit suli akisussaaffigineqarmat.

Kalaallit kissaataat kiisami tusarneqarmat, Inatsit Atuutsinneqarnerannut Naalakkersuisoq Naaja H. Nathanielsenip (IA) nuannaarutigalugu tusagassiuutinut nalunaarummi oqaatigaa.

- Pinerluttulerinermi inatsisip ineriartornermut malinnaanissaa, tamatsinnut pingaaruteqarpoq. Eqqartuussiveqarnermut tatiginninneq attanneqaannassappat, eqqartuussiviit iliuusereriikkanut kingunerititaasa aamma eqqugaasut inuiaqatigiillu naapertuilluartoqarneranik isiginninnerisa akornanni ataqatigiittoqassaaq.

- Qallunaat ministeriisa taarseraattuartut ataanni kalaallit kissaataasa akuersorneqarnissaata pilersinneqarnissaa ukiunik arlalinnik sivisussuseqarsimavoq, taamaammallu ulloq una pitsaasuuvoq, tassani siunnersuut inaarutaasumik akuersissutigineqarpoq, taanna oqarpoq.

Danmarkimi Inatsit atuutsinneqarnerannut ministeri Peter Hummelgaard (tv.)Inatsillu Atuutsinneqarneranut naalakkersuisoq Naaja H. Nathanielsen (th.) tusagassiortunik Nuummii katersortitsineranni. Assi © : Christian Klindt Sølbeck/Ritzau Scanpix

Eqqartuussiveqarneq uterteqqikkusukkaa

Pineqaatissiisarnermi killigititamik sivitsuineq eqqartuussiveqarnermi aaqqissuusseqqinnissamut aamma alloriarneruvoq.

Naaja H. Nathanielsenip oqarnera naapertorlugu eqqartuussiveqarnerup tigunissaa naalakkersuisut maanna anguniagaraat.

- Massakkut eqqartuussiveqarnerup aaqqissuussiffigeqqinneqarnissaa Naalakkersuisut suliaraat, tassani pinerluttulerineq pillugu inatsiseqartitsineq tiguneqassalluni. Tamanna iluatsissappat, siunissami pinerluttulerinermi inatsisip allanngortinneqarnerisa suliarineqarnissaat Inatsisartut kisimik aalajangertassavaat, taanna tusagassiuutinut nalunaarummi oqarpoq nangillunilu:

- Aaqqissuusseqqinneq politikkikkut partiit qanittumik oqaloqatigalugit aamma soorunami innuttaasut ilanngunneqarnerisigut pissaaq. Eqqartuussiveqarneq tamat oqartussaaqataaneranni sukarsuummat atatitsisoq, aaqqissuusseqqinnerup politikikkut innuttaasunillu atituumik tapersersorneqarnissaa Naalakkersuisut anguniassavaat.