Pisortaaneq ukiut arfinillit qaangiuttullu soraalertoq: - Siornarnit pitsaanerusumik inissisimavugut

Jens Lauridsen KNR-imit oqarasuaatikkut attavigigatsigu Ilulissat mittarfianiippoq.

Kalaallit Nunaanni mittarfiit nutaat pingasut akornanni kingulleq naammassingajalerpoq ammarnissaalu amigaataanginnalerpoq. Greenland Airportsimilu pisortaanerup Jens Lauridsenip ukiuni arfinilinni sulinera aamma tamaannga killeqassaaq.

Tamannalu ajornaatsuinnaanngilaq.

Taassuma ilaquttanilu aqqutaani aamma kamaanneqarneq aqqusaarsimavaat. Nuummi mittarfik annersaasoq siullerpaalluni ammarneqarmat ilungersunartoqarpoq, pisortaanerlu ulapingaatsiarsimavoq.

Jens Lauridsenilli suliani naammassinialeraa Greenland Airportsip sapaatip akunnerata matuma siuliani nalunaarutigaa. Ilulissanimi mittarfik oktobarip 29-ianni ammarpat, taanna atorfimminit soraassaaq.

- Ilulissani mittarfik piareerluinnangajalerpoq. Mittarfik atorsinnaalerpat Nuummi mittarfik assiginagu suna tamarmi piareereersimassaaq mittarfimmimi allagartarsuarnik nivinngaassuilereerpugut, Jens Lauridsen oqarpoq.

Nuannaarnermit qullilineq

Kalaallit Nunaanni mittarfinnik sanaartornermi siuttuusimanini tulluusimaarutigalugu Jens Lauridsenip oqaluttuaraa:

- Soorunami ilungersunartoqartarpoq, kisianni tamaat isigalugu ajunngilluinnarpoq. Nuummi Qaqortumilu mittarfiit atulereerput, Ilulissanilu mittarfik ammangajalerparput.

Qaqortumi mittarfik ammarmat timmisartorlu ilaasoqarluni apriilip 16-ianni mimmat nuannaarnermit qullilisimalluni Jens Lauridsenip aamma oqaluttuaraa:

- Qaqortumi ammaanersiorneq ajunngilluinnarpoq. Mittarfik kusanarluinnartoq ammarparput taanna nuannaarutigineqarlunilu nalliuttorsiutigineqarpoq, Jens Lauridsen oqarpoq.

Mittarfik naammassineqarmat imaanngitsoq Greenland Airportsip suliassani unitsikkaa taanna oqaluttuarpoq:

- Soorunami mittarfik ammarneqaraangat arlaannik pisoqartuaannarpoq, tamakkulu eqqumaffigilluinnarpagut. Aamma sulisoqarpugut mittarfiup ajunngitsumik ingerlaavartuarnissaanik ukkatarinnittunik.

Nuummi mittarfik isornartorsiorneqartoq

Nuummi mittarfik 2024-mi ammarneqalermat pissutsit allaanerulluinnarput. Tamannalu isornartorsiorneqanngitsoorsimanngilaq.

Aasaanerani angallannermi angalasussat isumannaallisaalluni nakkutilliivikkoorniartillutik akunnerni arlalinni utaqqisuniittariaqartarnerat, ukiup aallartinnerani sulisussaaleqineq ajornartorsiutinut ilaapput, tamakkulu pisortaanerup ulapputigingaatsiarpai.

- Siorna aasakkut sulinerput pitsaavallaarsimanngilaq tamannalu tulluusimaarutiginngilluinnarpara, Jens Lauridsen oqarpoq nangillunilu:

- Mittarfiup ingerlalluartinnissaata qanoq ajornakusoortigineranik oqaraangatta inuit ilaannut paasiuminaassinnaasarpoq. Aqqusinniornerinnaanngilarmi, Assersuutigalugu Inatsit angallannermilu akuersissutit aamma suliarineqangaatsiartarput.

Naak kissaatigisamittut amerlatigisunik sulisoqanngikkaluarlutik, siorna aasakkut sulisorineqartunit maanna amerlanerujussuarnik sulisoqarput.

Taamaammat aasaq manna ajornartorsiortoqannginnissaa Jens Lauridsenip qularutiginngilaa.

Isornartorsiut pissutissaqarluarnerarpaa, aammali inuttut sunniuteqarsimavoq:

- Isornartorsiorneqarluni nuannertuaannanngilaq, uattulli atorfillit aamma naammagiinnartariaqartarpaat tamanna. Kisianni arlalippassuit ilaquttannut aamma attaveqartarput suliassara aqussinnaanngikkinga oqaatigalugu, suliffiga pillugu ilaquttama taama pineqarnerat uannut artornartorujussuuvoq.

Ilulissani isumannaallisaanikkut nakkutilliineq ukkatarineqartoq

Nuup mittarfianut isornartorsiutit aamma pingaarutilinnik ilinniarfiungaatsiarput.

- Nuummi ajornartorsiutitta ilaat nalilersorpagut. Taamaalilluta mittarfiit aaqqiivigivagut, tamakkulu soorunami aamma pingaarutilinnik ilinniarfigaagut, Jens Lauridsen oqarpoq.

Ilulissani mittarfimmi isumannaallisaanikkut nakkutilliivimmi sulisussarsiulereerlutik taassuma ilanngullugu oqaluttuaraa.

- Tamanna Greenland Airportsimut iserluartitsinissatsinnik, sungiusaanerulersinnaanissatsinnik ilinniartitsilluarsinnaanissatsinnillu isumaqarpoq, Jens Lauridsen oqarpoq.

Suliffeqarfimmi pisortaanerup atorfimminit soraaruni qanoq pisoqassanersoq pilersaarusiorsimanngilaa. Ilulissanili mittarfimmut pilersaarutit malillugit ajornartorsiortoqarani ammarnissaa maannakkorpiaq pingaarnerutippaa.

Nuummi mittarfimmi siorna aasakkut ajornartorsiutit assigiinngitsut takkuteqqinnginnissaat qulakkeersinnaaviuk?

- Isumaqarpunga pisortat amerlanerit neriorsuinissartik mianersorfigisaraat. Kisianni oqaatigisinnaavara siorna aasakkut pisinnaasatsinnit pitsaanerungaartumik maannakkut piginnaasaqalersimanerput, aamma aasaanerani ulapaarfiusumi ingerlalluarnissarput anguniagaraarput.