Pilersuisoq Tasiilami: Pisisartut tusaavagut
Atisanik assigiinngitsorpassuarnik amigaateqarneq, naalungiarsuit arnallu atortussaannik amigaateqarneq naatitanillu nutaanik amigaateqarneq, nioqqutissat amigaatigineqartut Tasiilarmiut KNR-imit oqaloqatigineqartut tamakkuunerarpaat.
Taakkua ukioq manna aasaanerani nioqqutissanik amigaateqarneq ajornerulersimasutut misigaat - Islandimiillu ukiuunerani timmissartuussisoqartarunnaarnera aamma iluaqutaanngilaq.
KNR-ip innuttaasunit isornartorsiuineq KNI-mut saqqummiuppaa, Tasiilamilu Pilersuisoq alakkarlugu. Tassani Pilersuisoq Kangiani nunap immikkoortortaqarfiani pisortaq, Martha Mikaelsen, oqaloqatigaa.
Juliane Henningsen Heilmann, KNI-mi attaveqaqatigiinnermut pisortaavoq. Taanna allappoq, innuttaasut pakatsisitaanerat KNI-mit paasineqarsinnaasoq.
- Pisisartut pisiassaminnik pissarsisinnaanatik pakatsisitaasarnerat paasisinnaavarput.
Taanna nangilluni allappoq, nioqqutissat kissaatigineqartut umiarsuarmit tulliuttumit tikiunneqarumaartut.
Ilungersunartut immikkut ittut
Juliane Henningsen Heilmannip Tasiilaq assartuinermut tunngatillugu immikkut ittumik atugaqarnera oqaluttuaraa, tassanimi piffissaq angallannermi atorneqartartoq aalajangersimasumillu angallassisoqartarnera pingaaruteqarluinnarput.
KNI Islandimit ukiuunerani timmisartuussisoqartarunnaanerata kingorna aamma ilungersunartorsiorpoq.
- Allannguutaasoq pingaarutilik tassaavoq Islandip Tunullu akornanni ukiukkut timmisartuussisarnerup unitsinneqarnera.
Tamanna pingaartumik nioqqutissanut nutaanut tunngatillugu ilungersunartorsiorfiuvoq.
- Tamanna nioqqutissanik asiujanerusunik assartuinermut siornatigut periarfissaammat.
Taamaattumik attaveqaqatigiinnermut pisortaq, KNI-p Air Greenland Nuuk aqqusaarlugu timmisartumik ukiuunerani pilersuinissaq pillugu assartuinissaanik isumaqatigiissuteqarfigisimagaa, allappoq.
Ingerlatseqatigiiffiulli aaqqiissutissap pitsaanerpaajunnginnera nassuerutigaat.
- Nioqqutissat Kulusummiit Tasiilamut ingerlateqqinneqartussaanerat pissutigalugu, assartuinermut tunngatillugu suli ajornartoortoqarsinnaavoq, assartukkat tikiunneqarnissaat silamit timmisartuussinernillu sunnerneqarsinnaammata.
- KNI-p Kulusuup Tasiilallu akornanni timmisartuussinerit taamaatiinnarneqartarnerat siornatigut nalaannikuuaat, Islandimiilli nioqqutissanik tonsip ataatsip missaanik nassiussinermi nioqqutissat tunipallanneqartarnerat misilittakkanit ersersinneqarpoq.
Angallatit tissiartaatit tatisinerulersut
Martha Mikaelsen Tasiilami Pilersuisumi nioqqutissat akornanni angalaarpoq.
Taassuma pisisartut piumasaannik naammassinninnissaq, pingaartumik aasaq manna ilungersunarsimanera, maluginiarpaa.
Tamanna tissiartaatinik takornariarpassuaqalerneranik, pisiniarfiullu taakkua amerlassusaannik naatsorsoruminaatsitsineranik ilaatigut pissuteqarpoq.
- Tissiartaatinik aasaanerani takornariartut ilungersunarnerpaapput, taakkumi nioqqutissarpassuarnik pisisaramik.
- Tissiartaatit qanoq amerlatigisut tikissangatinneqarnerannik ilisimatinneqarneq ajorpugut, taamaattumik sulisut nioqqutissanik inniminniisut, nioqqutissanik qanoq amerlatigisunik inniminniinissartik nalornissutigisarpaat.
Nunap immikkoortuani pisortaq oqarpoq, nioqqutissanik amigaateqarnerup tungaatigut ilungersunartut assigiinngitsorpassuit suleqatinilu sapinngisartik tamaat iliuuseqarfigisarlugit.
- Soorunami pisisartut tamakku tamarmik maluginiartarpaat, tamannalu paasilluarsinnaavara. Uagut allatuulli nammineq aamma pisisartuuvugut, taamaattumik tamatta ingerlaannaq malugisarparput.
Sulisussaaleqisoqartoq
Martha Mikaelsenip pisiniarfinni sulisussarsiorneq aamma ajornakusoornerarpaa.
- Pisiniarfimmut sulisussarsiorneq ullumikkut ajornakusoortorujussuuvoq. Aasarli mannamut sulisussaaleqineq ajornartorsiutigisorujussuuarput.
Pisiniarfimmi pisortassarsiorneq aamma ajornakusoorpoq.
Sulisut sulisussaaleqineq pissutigalugu sulerulunnerusariaqartarput. Tamanna pisiniarfinni pisiassat tungaatigut malunniuttarpoq.
- Tamanna pisiniarfiup ingerlanneqarneranut pingaaruteqaqaaq. Sulisut ataasiussuseqarnerat ajornartorsiutaavoq, aqutsinerlu amigaataalluni.
- Tamanna pisiniarfimmi nioqqutissanik ilioraanissamut ajornakusoortitsivoq.
Martha Mikaelsen pisisartunut paasissutissiiniarlutik, nioqqutissat ilai sooq suli apuussimannginnerat nungussimaneriluunniit pillugu paasissutissiissutinik nivinngaassuisimanertik oqaluttuaraa.
- Akisussaasutut oqaannarsinnaavunga, nioqqutissat tamarmik tikinnissaat qulakkeerniarsarisaratsigu isumakuluuteqartoqartariaqanngilaq.
- Soorunalimi nungunnikunik apuutinngitsoortunilluunniit nioqqutissaqarsinnaasarpoq, tunniussukkalli qulakkeerneqarnissaat tamaviaassutigisarparput.
