Paul Watson iperagaasoq

Paul Watson pineqaatissineqarsimasunut Nuummi inissiisarfimmi juulimili tugummigallagaasuusoq iperagaavoq.

Paul Watsonip Japaniliaanneqassanerminik Danmarkip inatsiseqarnermut tunngasuni ministereqarfik tigummigallagaanermini aalajangersiivaa.

Paul Watsonili tassa Japaniliaanneqassanngitsoq, inatsiseqarnermut tunngasuni ministereqarfik aalajangeqqammerpoq.

Japan avatangiisinik illersuiniamik Paul Watsonimik 2010-mi tigusarinneqqusivoq. Watson Japanimi taamanikkut oqartussat oqarnerat naapertorlugu japanimiunut arfannialeruttortunut akornusersuilluni navianartorsiortitsivoq umiarsuaannillu innarliilluni.

Taamanikkut arfanniat ilaat Japanimi oqartussat aamma oqarnerat naapertorlugu ajoquserpoq, tamannalu Paul Watsonimik tigusarinneqqusinerminnut ilaatigut tunngavilersuutigalugu. 

Watsonili taamanikkulli pisuunnginnerarpoq.

Kisianni Watson tassa iperagaagami Frankrigimut angerlariaannanngortoq, illersuisuata aappaa Julie Stage nutaarsiassaqartitsivimmut Ritzauimut oqarpoq.

Inatsisilerinermut tunngasuni naalakkersuisoq Naaja H. Nathanielsen naalakkersuisut tamanna pillugu tusagassiorfinnut nalunaarutaanni ima oqarpoq:

- Inatsiseqarnermut tunngasuni ministereqarfiup nunallu eqqartuussiviisa suliamik tunngavilersugaasumik suliarinninnissaat aamma inatsisit atuuttut malillugit tunniussinissamut piumasaqatit naammassineqarsimanerannik qulakkeerinnissimanissaat, tunngaviusumik naalakkersuisut tatigaat.

Inatsisit atuutsinneqarnerannut suliassaqarfik qallunaat akisussaaffittut suli suliassaqarfigimmassuk suliaq naalakkersuisut saneraanit malinnaaffigigaat, taanna naalakkersuisut tusagassiorfinnut nalunaarutaanni aamma oqarpoq.