Nunatta nunani avannarlerni illersornissaq pillugu suleqatigiinnermi peqataanissani piumasarigaa
Nunarput nunat avannarliit illersornissamut politikki oqallisigigaangassuk peqataasassaaq.
Naalakkersuisut siulittaasuat Jens-Frederik Nielsen (D), nunani avannarlerni naalakkersuisut siulittaasui ukiumoortumik aasaanerani ataatsimiillutik sisamanngornermi katersuummata, taama oqarpoq.
- Nunatta illersornissaanut, nakkutilliinissamut piginnaanngorsaanermullu tunngatillugu suleqativut peqatigalugit iliuuseqarnerusariaqarluta nalunngilarput. Tamannalu anguniarnerani peqataatinneqassaagut aamma peqataavugut, taanna KNR-imit apersorneqarluni oqarpoq.
Siulittaasoq nunani avannarlerni naalakkersuisut siulittaasuisa, illersornissap tungaatigut suleqatigiinnerulernissaq pillugu oqaloqatigiinnissaat sioqqullugu, taama oqaaseqarpoq.
Nunani avannarlerni naalakkersuisut siulittaasui danskit ministeriunerat Savalimmiunilu lagmandi qaaqqusisoralugit Marienborgimi katersuupput.
- Ajoraluartumik silarsuarmi aaqqissuussaanermi maanna inuuffigisatsinni sakkutooqarnerup annertusiartornera nalinginnaalersimavoq. Pissutsit taamaattut sungiusimanikuunngilarput. Sakkuaattoqannginnissaa ukiorpassuarni eqqartorneqarpoq. Maanna taamaakkunnaarpoq.
- Tunniussaqarnerussaagut tamannalu piareersimaffigaarput. Kisianni tamanna aamma kalaallit innuttaasuinut iluaqutaasariaqarpoq, Jens-Frederik Nielsen oqallinnissaq sioqqullugu oqarpoq.
Danmark Savalimmiullu Nunat Avannarliit Ministeriisa Siunnersuisoqatigiivini ukioq manna siulittaasuupput.
Nunatta Nunat Avannarliit Siunnersuisoqatigiivinut tamakkiisumik peqataajumajunnaarnerata kingunerisaanik siulittaasuuffimmut peqataanngilaq.
Tamanna nunatta isumannaallisaanermut politikki pillugu ataatsimiinnernut arlalinnut peqataatinneqartannginnerata kingorna pivoq.
- Nunat avannarliit siunnersuisooqatigiivinut ilaasortanngorusuppugut, nunalli allat assigalugit atugassaqartinneqassaagut. Tamanna aamma oqaloqatigiissutigissavarput, Jens-Frederik Nielsen oqarpoq.
Naligiinnissaq piumasarigaa
Danskit naalakkersuisuisa kalaallit Savalimmiormiullu tamakkiisumik naligiissumillu peqataanissamik kissaataat tapersersorpaat.
Nunat avannarliit ataatsimiititaliarsuaq, Kalaallit Nunaata, Savalimmiut Ålandillu Nunat Avannarliit Siunnersuisoqatigiivinut Ministerinullu Siunnersuisoqatigiivinut naligiittut ilaasortanngornissaannut siunnersuuteqartussaq pilersinniarlugu marsimi isumaqatigiissutigaat.
Tamanna Helsingforsimi isumaqatigiissutip, Nunat Avannarliit Siunnersuisoqatigiivisa Ministerit Siunnersuisoqatigiivisalu sulineranni sinaakkutaasup, nutarterneratigut aatsaat pisinnaavoq.
Nunat Avannarliit Siunnersuisoqatigiivinut ilaapput Danmark, Sverige, Finland, Norge aamma Island, kiisalu Kalaallit Nunaat, Savalimmiut Ålandilu.
Kalaallit Nunaat Savalimmiullu Danmarkimit aallartitat aqqutigalugit sinniisoqarsimagaluarput.
- Nunat Avannarliit Siunnersuisoqatigiivini peqataasut tamarmik naligiissinneqarnissaat politikkikkut isumaqatigiissutigineqarnissaa massakkorpiaq pingaarnerpaavoq.
- Namminiussuseqarluta peqataarusuppugut. Naligiikkusuppugut, peqataassaguttalu immikkoortitsisoqassanngilaq. Tassuuna allanngortoqanngilaq, Jens-Frederik Nielsen KNR-imut taama oqarpoq.
Jens-Frederik Nielsenip Savalimmiunilu lagmandip, Beinir Johannesenip, tusagassiuummut Ritzauimut tamakkiisumik ilaasortaanerup tunngaviusumik aamma apeqqutaanera erseqqissarpaat.
Nunat taakkua nunat avannarliit suleqatigiinneranni suut tigussaasumik iliuuserisinnaaneraat apeqqutigineqarmat Beinir Johannesen ima akivoq:
- Tassa allatulli naligiissinnaanerput Nunallu Avannarliit Siunnersuisoqatigiivisa nunallu avannarliit suleqatigiinnissaannut piumasaqaataasunut tamanut peqataasinnaagatta. Tamatumalu malitsigisaanik akisussaaffimmik tigusinissarput piareersimaffigaarput, lagmandi Ritzauimut taama oqarpoq.
Suli naammassisoqanngitsoq
Tamatuma saniatigut Kalaallit Nunaata eqqaani isumannaallisaanikkut pissutsit ilungersunarnerulersimapput.
Amerikamiut præsidentiata Donald Trumpip Kalaallit Nunaat USA-mut ilaasariaqartoq, arlaleriarluni oqaatigaa.
Kalaallit Nunaata, Danmarkip USA-llu akornanni aaqqiissutissamik ujartuisussamik januaarimi suleqatigiissitaliortoqarpoq.
Suleqatigiissitaliortoqarneranit qaammatit arfineq- pingasut qaangiupput. Isumaqatigiinniarnerit sumut killinnerat oqaaseqarfigisinnaaviuk?
- Oqaloqatigiinneq pivoq. Suleqatigiissitaq ataatsimeeqqingajalerpoq. Sulili naammassisoqalerneranik takusaqanngilagut, aaqqiissutissanilli ujartuinitsinni pimoorussisorujussuuvugut. Taamaattumik soorunalimi ataatsimeeqqinnissaq utaqqivarput.
- Naammassiffissatsinnulli suli killinngilagut, taamaattumik oqaloqatigiinnissamut piareersimasariaqarpugut, Jens-Frederik Nielsen oqarpoq, isumaqatigiinniarnerillu pillugit tigussaanerusumik oqaaseqarsinnaannginnini nangilluni oqaatigalugu.
Danskit nunanut allanut ministeriata Lars Løkke Rasmussenip juunimi oqarneratut, illit isumaqatigiinniarnerit ukiup naannginnerani aaqqiivigineqarnissaat naatsorsuutigaajuk?
- Aaqqiissutissanik nassaartariaqarpugut, maannamullu oqaloqatigiinneq ingerlaannassaaq. Anguniagarput suli tikilinngilarput, ukiunili amerlasuuni illuatungeriittut naligiittut iligiittullu nuannaartutut, siumut isigilerniarluta, aaqqiissutissanik ujartuineq pimoorulluinnarparput.
