Jens-Frederik Nielsenip nunat avannarliit siuttui sakkussiorneq pillugu oqalliseqatigissagai

Danskit ministeriunerat, Mette Frederiksen (S) aamma Savalimmiut lagmandiat nunat avannarliit aasaanerani aggustip 20-anni sisamanngornermi ataatsimiinneranni qaaqqusisuussapput.

Ministeriuneqarfik tusagassiuutinut nalunaarummi paasissutissiivoq.

Kunngikkormiut Livgardip Kaserniani pingaarnermi Høvelte Kasernimi aamma Marienborgimi ataatsimiittoqassaaq.

Ataatsimiinnermi naalagaaffimmi naalakkersuisunilu qullersat Nunat Avannarlerni illersornissaq pillugu qanimut suleqatigiinneq aamma nunat avannarlernit meeqqat inuusuttullu internettikkut qanoq illersuisoqarsinnaanerat oqaloqatigiissutigissavaat.

- Siullertut sakkussiornermi suleqatigiinnerup qanoq nukittorsarneqarnissaa aamma ataatsimoorluta saassussinermik pinaveersaartitsinitta annertusarnissaa oqaluuserissavarput, ilaatigullu Ukrainemi sorsunnermi ilisimasat nutaanerpaat atorluarnissaat, Mette Frederiksen tusagassiuutinut nalunaarummi oqarpoq.

Ministeriunerup russit Ukrainemut saassussinerat ukiut tallimassaanni maanna ingerlasoq aamma Amerikamiut præsidentiannit, Donald Trumpimit Danmarkimut Kalaallit Nunaannullu arlaleriarluni – aamma 2026-mi sioorasaaruteqartoqarnera erseqqissaatigai.

- Piffissami matumani nunat avannarliit suleqatigiinnerisa naleqarnerujussua nukittussusaalu erseqqissumik takutinneqarpoq. Taamaammat nunat avannarlerni suleqatima arfineq-marluk naapinnissaat qilanaaraara, taanna oqarpoq.

Sakkutooqarnerup aamma meeqqanik inuusuttuaqqanillu internettikkut isumannaatsuunerup sammineqarnissaata saniatigut "Savalimmiut Kalaallit Nunaata nunat avannarlerni tamakkiisumik naligiissumillu peqataanissaat" aasaanerani ataatsimiinnerami aamma oqaluuserineqassasoq ministeriunerup erseqqissaatigaa.

Finskit, Islandimiut, norskit svenskillu ministeriuneri kiisalu nunatsinni naalakkersuisut siulittaasuat, Jens-Frederik Nielsen ataatsimiinnermi aamma peqataassapput.

Finlandip iluani qeqertami namminersortumi siulittaasoq, Katrin Sjögren ataatsimiinnermi aamma peqataassaaq.

Ataatsimiinneq Høvelte Kasernimi aallartissaaq, tassanilu danskit illersornissamut pisortaat, Michael Wiggers Hyldgaard aamma peqataassalluni.

RITZAU